Áhugamálin mín

Bútasaumur

2012-02-04T14:08:00.001Z

Ég gerði svona snyrtibuddur/pennaveski fyrir jólin og gaf í jólagjafir. Ég reyndi að velja efnin og litina eftir þeim sem áttu að fá þær t.d. fékk Sæunn bróðurdóttir mín þessa grænu og fyllti ég hana af allskonar snyrtidóti og svo setti ég ég "bókaorm" sem er bókamertki með þessu þar sem hún er svoddan bókaormur;-)

Á myndinni sést hvernig þetta er gert, fyrst saumar maður ræmur beint á bak.

Þessa bláu fékk hún Sigrún Ingibjörg bróðurdóttir mín. Ég fyllti þessa líka með ýmsum snyrtivörum og bókamerki, því hún er líka mikið fyrir lestur.

Hér er ég búin að sauma budduna saman en er að setja í hana rennilás og snýr rangan út.

Þessa hér fyrir neðan gerði ég reyndar fyrst þannig að hún er prufan! Hana ætla ég að eiga og fyllti hana af ýmiskonar pennum og nota hana sem pennaveski. Á þessari mynd er buddan/veskið fullgert.

Þessu teppi byrjaði ég á fyrir löngu síðan en það varð ekkert úr því að ég kláraði það. Nú er Hildur mín Saga að verða fjögurra ára og fannst mér það vera allt of lítið fyrir hana. Ég tók mig til og stækkaði það um eina mynsturrönd og bætti húsinu þar inn. Teppið heitir að mig minnir Dýrin í sveitinni.

Þetta er lúrteppi fyrir hana, mátulega stórt til að setja yfir sig í sögustund með pabba og mömmu.

Set eitthvað fleira hér inn eftir því sem tími leyfir. Takk fyrir innlitið.

Jól í Lyngbergi 2011 og heklaðar jólabjöllur.

2012-01-08T14:24:00.003Z

Ég hef nú gert ýmislegt skemmtilegt frá því síðasta blogg birtist á þessari síðu en ég held ég sé ekkert að setja það hér inn núna, geri það kannski seinna. En fyrir jólin þá heklaði ég svona jólabjöllur utan um seríur handa litlu fjölskyldunni í Eskilstuna, Ástu Sigrúnu og Kalla og Söru. Þegar ég hafði lokið þessum þremur þá langaði mig að eiga svona líka svo ég gerði eina fyrir Lyngbergið.

Eins og þið vitið þá er þessi bakki algjört uppáhald hjá mér. Hann er klæddur í nýjan búning eftir árstíðum og svona leit hann út núna um jólin.

Það snjóaði og snjóaði og eina nóttina þegar ég kom fram var birtan svo ótrúlega falleg og glugginn í eldhúsinu skartaði sínu fegursta í þessari birtu. Ég tók myndirnar hér fyrir neðan án flass og finnst þær ennþá dulúðlegri fyrir bragðið.

Kannski ég komist í bloggstuð núna, hver veit?

Leti eða bara nóg að gera!

2011-02-07T17:54:00.002Z

Já leti eða er bara nóg að gera hjá mér? Síðustu blogg hafa byrjað eitthvað á þá leið að nú sé langt síðan síðast eða langt frá því síðast blogg var sett hér inn. Ég hallast helst að því að ég hafi bara nóg að gera. Í haust hef ég nú aðallega verið að prjóna eitt og annað sem ég set myndir af hér fyrir neðan. Jólin komu og fóru en ég held nú samt að það skemmtilegasta sem gerðist í haust var að þær komu til Íslands mæðgurnar frá Eskilstuna og ég naut þess að vera amma í nokkra daga. Hildur Saga mín er orðin svo stór og dugleg og við áttum yndislegar stundir saman ömmgurnar.

Ég hef verið að föndra eitt og annað og eru þessi prjónamerki dæmi um það. Ég hef reyndar verið að selja þau og renna þau út eins og heitar lummur. Skemmtilegt að gera eitthvað allt annað en ég er vön.

Ástu Sigrúnu mína langaði í trefil/sjal og valdi litina í það í haust. Við fundum síðan uppskrift af gömlu langsjali með skemmtilegu skeljamynstri sem ég prjónaði fyrir hana. Það er úr einbandi og strekktum við það mátulega mikið þ.e. hún vildi hafa það strekkt en ekki svo mikið að það væri sjal, vildi hafa það sem trefil.

Þegar við Ásta Sigrún keyptum í sjalið keypti ég þennan plötulopa (sem er svo skemmtilega sprengdur í litnum) og tvo liti af einbandi til að prjóna með honum. Nú er ég að ljúka við peysu úr þessu (á Hildi Sögu).

Hér fyrir neðan er svo mynd af peysunni en ég er bara búin að prjóna hana á eftir að ganga frá endum og sauma tölurnar á. Set aðra mynd af henni þegar ég er búin að ganga frá og prjóna húfuna (sem er hálfprjónuð). Ég prjóna hana úr einföldum plötulopanum en skipti einbandinu út til skiptis rauðu og appelsínugulu. Þá myndast þessar skemmtilegu rendur.

Mér finnst alltaf svo gaman að taka myndir hér heima og fylgir hér ein með.

Hér fyrir neðan eru myndir af bakstri og kókóskúlugerð en eins og ég hef áður sagt frá þá förum við Maggi oft í bústað fyrir jólin og gerum eitthvað skemmtilegt fyrir jólin. Í þetta skiptið fórum við tvær ferðir, önnur var jólakortaferð en í hinni bjuggum við til kókóskúlurnar sem tilheyra nú eiginlega konfektgerð heimilisins.

Og á meðan ég gerði þær, hnoðaði Maggi í hnetusmjörskökur en þær eru látnar bíða úti við (kjöraðstæður -4°) og síðan bakaðar. Eitt af því besta sem við gerum fyrir jólin.

Við gerum oft eitthvað nýstárlegt þegar við förum í bústað og um daginn steiktum við ástarpunga. Við höfum oft steikt kleinur fyrir jól en aldrei ástarpunga og voru þeir bæði vel heppnaðir og hættulega góðir;-)

Og að lokum er hér mynd af peysu sem ég var að prjóna úr léttlopa á mig. Það er svo merkilegt hvað ég er oft ósátt við peysur sem ég prjóna á mig sjálfa.

Þá held ég að nóg sé komið í þetta blogg. Ég er ekkert að telja upp öll jólaverkin en körfurnar voru á sínum stað og ýmislegt skemmtilegt rataði í þær sem ég hef ekki sett áður t.d. heimagert konfekt í litlum dósum og enskar skonsur o.fl. Bless í bili og ég vona að það líði ekki eins langur tími fram að næsta bloggi.

Nú er langt síðan síðast.

2010-09-05T13:35:00.011Z

Í rauninni ætla ég ekki að skrifa langt blogg í þetta skiptið heldur láta myndirnar tala sínu máli. Mér fannst í raun sumarið í ár vera frekar viðburðalítið en svo þegar ég sest niður og set inn allar myndirnar þá sé ég að það hefur bara heilmargt gerst hjá okkur og við verið bara nokkuð dugleg:-) Vorboðinn var heimkoma Ástu Sigrúnar sem er alkomin (í bili alla vega). Hún útskrifaðist frá Edinborg með glæsibrag í júlí og er nú að byrja í meistaranámi við HÍ. Hún sem sagt kom og fór,- það er að segja hún er nú orðin Kópavogsbúi og fer vel um hana þar. Við héldum upp á útskriftina hennar með fjölskylduboði og svo heljar partýi um kvöldið með vinum hennar og frændsystkinum.

Hér fyrir ofan er BA hon. Ásta Sigrún Magnúsdóttir heima í Lyngbergi rétt orðin Kópavogsbúi. Þegar hún var nú blessunin búin að tæma herbergið sitt hér heima þá gerði ég með hjálp Magga míns og fl. mér lítið fyrir og hreiðraði um mig í því. Ég hef aldrei haft neina aðstöðu í húsinu fyrir áhugamálin mín en nú er bara heilt herbergi fyrir mig. Maggi og Inga máluðu herbergið (á meðan ég undirbjó útskrift;-)

Síðan kom hann pabbi minn og við parketlögðum. Ásta Sigrún skildi þennan fallega skáp eftir og málaði ég hann með sama lit og veggina í herberginu.

Kemur mjög vel út að mínu mati.

Keypti mér þennan líka fína stól, lampann og borðið í IKEA (hvar væri maður ef ekki væri IKEA á Íslandi?

Þarna setti Maggi minn upp borð fyrir mig og hillur og fleira. Á þessu borði ætla ég að vera með skurðarmottuna fyrir bútasauminn og efnin mín og fleira tengt bútasaumi og skrappi í skúffunum og hillum. Skúffueiningarnar eru á hjólum og borðplata ofan á þeim svo ég get dregið þær til mín þegar ég er að vinna við hitt borðið. Eins og sjá má þá er þetta borð frekar hátt og er til þess að standa við það og vinna. Ásta Sigrún gaf mér þennan segul sem er á veggnum hægra megin við borðið og eru box á honum fyrir títuprjóna og tölur og fl

Þetta borð er síðan í hæð til að sitja við og vinna. Maggi hengdi slár fyrir ofan bæði borðin og gaf mér þessar skemmtilegu leirkrúsir sem eru flottar geymslur fyrir alls konar verkfæri og fl.

Ég hef nú ekki verið dugleg við handavinnu í sumar, ég náði þó að klára kjólinn og peysuna á Hildi Sögu. Myndin hér að ofan er ekki í nógu góðum litum (sést betur í síðasta bloggi) en þetta kom reglulega skemmtilega út. Kjóllinn er heldur stór á hana en hún vex svo hratt að hann verður passlegur áður en langt um líður.

Þetta teppi prjónaði ég handa henni Evu litlu frænku minni sem fæddist í júlí. Hún er fyrsta barn Þorra míns og Emmu.

Við Maggi fórum síðan norður í land í eina viku, vorum á Akureyri fyrri hlutann og komu Kalli og Sara til okkar og síðan hittum við ferðahópinn á föstudeginum fyrir verslunarmannahelgi og ferðuðumst með þeim í Fnjóskadalinn og í Fjörður.

Þessi mynd er tekin niðri í fjöru í Fjörðum.

Það tilheyrir í ferðum okkar að sitja við varðeld á kvöldin og syngja og skemmta okkur.

Ég skellti mér svo í Reykjavíkurmaraþonið og hljóp 10 km. og safnaði áheitum fyrir Parkinsonsamtökin. Safnaði 56.500 kr. og þakka allan stuðninginn. Myndin hér að ofan er af nokkrum samstarfsmönnum og vinum. Æðislegur hópur og hvetjandi með eindæmum.

Og nú er haustið komið með allri sinni fegurð og skólinn byrjaður aftur og allt að komast í rútínu. Kalli farinn að lesa lögfræði og Sara að ljúka Flensborg og Ásta Sigrún byrjuð í námi um Alþjóða samskipti. Gulli og Sandra komin í gang með sín verkefni, Gulli í sínu doktorsnámi og kennslu og Sandra vinnu í leikskólanum en fer von bráðar að takast á við ný verkefni í nýjum skóla og Hildur Saga farin í leikskólann aftur. Við Maggi komin á okkar staði í skólunum og nokkuð sátt.

Og nú er bakkinn fallegi kominn í haustskrúða. Þetta átti víst ekki að verða langt blogg í þetta skiptið en svona er þetta bara þegar maður byrjar á annað borð.

Blogghlé/leti!

2010-04-29T21:21:00.002Z

Það er orðið ansi langt síðan ég bloggaði síðast, það er ekki svo með sagt að hér hafi ekki verið nóg að gera og ýmsu komið í verk. Síðustu vikuna fyrir páska fór ég ásamt tveimur samstarfsmönnum mínum með 62 nemendur úr 9. bekk að Laugum í Sælingsdal. Þar voru einnig 35 nemendur úr Myllubakkaskóla í Reykjanesbæ ásamt 2 tveimur starfsmönnum þaðan. Þarna vorum við í heila viku með þessa frábæru krakka sem nutu dvalarinnar í leik og starfi. Ég tók náttúrulega prjónana með mér og prjónaði þennan snúna sjalkraga handa henni Ástu Maríu, mágkonu minni sem varð fimmtug þann 4.4.

Þegar heim kom fór ég beint í páskafrí sem var yndislegt, rólegheit og engin plön í gangi á heimilinu nema að njóta þess að vera saman, fara í göngutúra, borða góðan mat og hafa það sem allra best.

Við gerðum okkur þó ferð inn í Fljótshlíð (eins og sjálfsagt meira en helmingur landsmanna) til þess að sjá gosið á Fimmvörðuhálsi. Við fórum með Þorkeli, Ástu, Jóni, Ástu Maríu, Helgu Dröfn, Lalla, Kristjáni, Árna Hlyni, Tómasi Snæ, Herði og Ástu Kristínu, takk fyrir yndislega ferð og samveru. Þessi ferð var afmælisferð fyrir afa Kalla og fengum við að njóta með honum. Ótrúlegt á að horfa þó úr fjarlægð væri (frá Þórólfsfelli). Á meðan við vorum í Fljótshlíðinni var Kalli með vinum okkar Ellu, Garðari, Ingu og Einari ásamt fleirum uppi við sjálfar gosstöðvarnar.

Svo komu páskarnir með öllu tilheyrandi, páskaeggjum, góðum mat og frábærum brunch hjá afmælisbarni páskadags henni Ástu Maríu.

Ég er búin að hafa svo gaman af speglinum (sem ég nota sem bakka undir kertaglösin mín). Nú var hann kominn í páskabúning en hægt er að sjá hann í haust- og jólabúningi í þessu bloggi http://siggalo.blogspot.com/2009/10/hausti-me-kertaljosum-inni-og-uti.html

Eftir að ég kláraði teppin, Flóafárið og teppið handa Þorra og Emmu, var ég bara lengi í gang aftur. Nú er ég þó öll að koma til og er að prjóna þennan fallega sumarkjól handa Hildi Sögu minni og einnig er ég búin að kaupa í litla gollu við hann.

Nú lofa ég sjálfri mér því að vera duglegri við bloggið, mér finnst þetta skemmtilegt og svo geta börnin mín stór og smá og aðrir ættingjar í útlöndum fylgst með og ég held bara að þau geri það:-) Bless í bili.

Flúðir og tvö teppi kláruð!

2010-03-15T14:06:00.001Z

Við Maggi fórum á Flúðir um helgina og áttum yndislega helgi. Það er svo gott að fara svona út úr bænum í kyrrðina í sveitinni og njóta þess að vera saman í rólegheitum, borða góðan mat og ég tala nú ekki um að vinna ýmislegt sem þarf að klára. Maggi notaði tímann í ýmislegt vinnutengt og í námið sitt og spilaði á gítarinn inn á milli en ég notaði tímann í að ljúka endanlega við teppin sem ég hef verið að sauma.

Hér að ofan sjást svo herlegheitin, búið að sauma bindinguna á bæði teppin.

Á þessari mynd er stjörnuteppið (Flóafárið).

Og hér er það svo komið á sinn stað í sjónvarpssófanum. Ég held að ég sé að sættast við það.

Á þessari mynd er svo teppið þeirra Þorra og Emmu tilbúið til afhendingar en ég er að reyna að finna einhvern sem er á leið til Dublin til að taka það með sér, ég þori varla að senda það í pósti svo ef einhver sem les þetta blogg er á leið til Dublin og er til í að taka "smápakka" með sér, vinsamlega láta vita ;-)

Á þessari mynd er ég búin að taka forskot á sælunni og breiða þetta líka fallega teppi yfir rúmið mitt og ég get bara sagt að ég er alsæl með það og vona að þau verði það líka þegar það verður komið á þeirra rúm.

Þar sem ég verð ekki heima á afmælisdeginum mínum (verð vonandi á Laugum í Sælingsdal með 62 yndislegum 9. bekkingum), þá gaf Maggi mér afmælisgjöfina um helgina og voru það þessar þrjár bútasaumsbækur sem ég hafði óskað mér. Nú er bara spurning hvað ég á að gera við tímann minn þar sem ég hef lokið við þau verkefni sem ég átti ókláruð, best að kíkja í bækurnar fínu ;-)

Ýmislegt.

2010-03-03T23:45:00.005Z

Undanfarnar vikur hef ég verið heima vegna raddleysis. Það er mjög óþægilegt að vera flautuð út af á miðri önn og ég hef átt erfitt með að horfast í augu við það. Ég ákvað þó að nota tímann vel, þar sem ég er ekki rúmliggjandi eða óvinnufær með öllu, og vinna upp ýmislegt sem ég hef ekki haft tíma til.

Nei þetta er ekki peysan sem ég prjónaði á Hildi Sögu í fyrra heldur önnur ný og fín. Peysan sem hún fékk í fyrra hvarf með öllu og veit enginn hvar hún er niðurkomin. Húfan er á sínum stað svo það var ekkert annað að gera en prjóna nýja við húfuna.
Teppið handa Emmu og Þorra er nú að verða tilbúið. Á myndinni hér fyrir ofan þá er dekkið nánast tilbúið það vantar bara síðustu röndina utan með því. Ég er nú búin að sauma hana við og er nú búin að senda teppið í quilteringu, þar sem það verður sett saman og þá er eingöngu eftir að setja bindinguna á það.
Jæja þá eru það syndirnar og sú stærsta er Flóafárið frá því í fyrr. Ég kláraði það í fyrra vor og keypti allt sem þurfti til þess s.s. efni í bak, bindingu og vatt. Nú er ég búin að setja það saman.
Og ég er þessa dagana að stinga það og gengur það bara nokkuð vel þó svo að þetta sé fyrsta stóra verkefnið sem ég sting í vél.
Set myndir af því þegar ég er búin með það.

Þetta mjakast ;-)

2010-02-19T18:13:00.007Z

Svona er staðan með teppið þeirra Þorra og Emmu. Fyrsta myndir sýnir þegar miðjan og næstu tvær raðir voru komnar saman.

Hér hefur svo aðeins bæst við og ágætis mynd komin á það.

Sú síðasta sýnir hver staðan er í dag, miðjan tilbúin þ.e. munsturhlutinn, bara eftir að sauma tvö horn við. Þá er að byrja á köntunum sem eiga að vera utan um allt teppið en þeir eru í þremur litum.

Flúðir, Gullfoss og bútasaumsteppi.

2010-02-05T23:17:00.020Z

Við Maggi fórum að Flúðum um síðustu helgi. Við fórum fyrst og fremst með það í huga að slappa af og hvíla okkur. Þessar hvíldarferðir fela það helst í sér að hafa nógan mat og góðar veigar með, eitthvað skemmtilegt að lesa, handavinna er ávalt með í farteskinu og gítarinn góði. Svo má náttúrulega ekki gleyma sundfötum þar sem potturinn er óspart notaður (mörgum sinnum á dag).

Í þetta skiptið skelltum við okkur að Gullfossi. Veðrið var yndislegt og mig hefur lengi langað til þess að sjá hann í vetrarbúningi.
Við vorum á ferðinni um miðjan daginn og var birtan ótrúlega á þeim tíma dagsins

Ekki var Gullfoss í klakaböndum þó svo að kalt væri, en það var um -6° á Flúðum þegar við lögðum af stað og dálítið rok þannig að mér fannst nú bara skítakuldi þegar við komum upp að Sigríðarbúð því þar var enn kaldara.

Það var tölvert krap í fossinum og klaki á flúðunum.

Birtan var svo dulúðleg, þegar við vorum að leggja í hann aftur heim í bústað og sást vel til fjalla og inn á jökul. Hér skarta Jarlhetturnar sínu fegursta í ljósaskiptunum.
Það var tölvert kaldara við Gullfoss heldur en á Flúðum og allt freðið við Sigríðarbúð.
Þessi mynd er tekin á leið heim í bústað.

Í sumar sem leið giftu Þorri bróðir og Emma sig. Við Maggi gáfum þeim loforð um bútasaumsrúmteppi í brúðargjöf. Þau komu svo heim nú um jólin og völdu sér munstur og efni í teppið. Hér fyrir ofan má sjá efnin sem þau völdu sér. Ég tók þetta og saumavélina með mér á Flúðir og náði að sauma töluvert.
Hér má svo sjá munstrið sem þau völdu en það er frá Thimbleberries. Efnin eru jafnfremt frá því fyrirtæki
Ég náði að sauma 60 stóra ferninga og svo eru 480 litlir af brúna og drapplita og 6o stykki af þeim grænu og drapplitu.
Þeir litlu eru svo saumaðir annars vegar 4 ferningar í lengju og aðrir fjórir plús einn grænn og drapp í aðra lengju.

Lengjurnar eru síðan saumaðar við stóra ferninginn og hér er ein blokk komin. Efnið sem er undir blokkinni á að nota í kannt meðfram öllu teppinu. Það eru 60 svona blokkir sem fara í teppið eins og það verður endanlega og svo eru saumaðir kantar í tveimur brúnum litum og utanum blokkirnar og síðan kemur þessi kantur úr efninu hér að ofan. Þetta blogg er fyrir Emmu og Þorra svo þau sjái hvernig miðar. Ég er núna búin með 11 svona blokkir.

Viðurkenning!

2010-02-02T16:04:00.002Z

Þetta fékk ég sent frá henni Hellen. Takk fyrir Hellen, ég hef ekki fengið slíkt áður. Þessari viðurkenningu fylgir að ég setji tengil yfir á bloggið hennar, ég á að skrifa 7 staðreyndir um sjálfa mig og senda 7 bloggurum viðurkenninguna áfram.

Ef við byrjum á staðreyndunum þá:

1. Ég hef haft hannyrðir ýmis konar sem áhugamál frá því ég man eftir mér sem lítilli stelpu svona 4-5 ára að sauma með langömmu minni Guðrúnu en hún lést þegar ég var 11 ára en hún var þá 97.

2. Ég er ekki morgunglöð!

3. Ég hef tamið mér að vera tiltölulega þolinmóð í seinni tíð en það er mér ekkert sérstaklega eðlislægt.

4. Ég er skelfilega hrædd við að keyra yfir ár og vötn í fjallaferðum.

5. Mér finnst ömmuhlutverkið það skemmtilegasta sem ég hef fengið um ævina.

6. Mér líður best þegar við erum öll saman fjölskyldan.

7. Ef ég ætla að kaupa mér föt fer ég alltaf í svörtu deildina, hahaha

Blog award!! I need to make a link from my blog to the blog of the person that sent me the award. I also need to say seven things about my self, and send the award to seven blogfriends.

1. Craftwork has been my hobby since I was little and I can remember myself 4-5 years old sewing with my great grandmother Guðrún and she died when I was 11 years old and then she was 97.

2. I am not a morning person!

3. I have tried to develope patience through the years although patience is not really in my nature.

4. I am petrified when crossing rivers and lakes, specially when I travel offroad.

5. I find being a grandmother the best role I have had in my life

6. I feel best when I am surrounded by my family

7. When I go shopping for chlothes, I go directly to the "black section" !

Þeir sem ég ætla að senda þessa viðurkenningu eru: Ásta Sigrún, Maggi minn, Síðan hennar Hildar Sögu, Helga Dröfn, Slagt en hellig ko, Hvítur lakkrís, Rannveig Vigfúsdóttir á Spáni.

Ég vona að þið setjið þetta inn hjá ykkur elskurnar nú ef ekki þá bara það.

Er hún ekki fín, stúlkan mín?

2010-01-31T12:52:00.003Z

Nú er hún Hildur Saga mín búin að fá pakkann frá mér og mér sýnist hún fín í nýju peysunni sinni.

Og ég sem hélt að peysan yrði allt of stór, en hún virðist passa vel á hana.
Flott módel!

Janúar að verða búinn, hvað tíminn líður.

2010-01-15T12:42:00.015Z

Ótrúlegt hvað tíminn líður. Mér finnst eins og desember, jólin, áramótin og dvöl allra barnanna okkar hafa flogið fram hjá mér og nú er langt liðið á janúar 2010. Við fengum alla heim um jólin. Ásta Sigrún kom um miðjan desember og Gulli, Sandra og Hildur Saga komu þann 20. des. beint í útskriftarveislu Kalla okkar. Við erum sem sagt búin að vera hér saman öll sömul og Sara hans Kalla líka í 3 vikur. Nú hafa þau flogið í burtu hvert af öðru, Litla fjölskyldan fór heim til Eskilstuna þann 9. jan., Kalli fór með meistaraflokki FH þann 12. (kom til baka þann 16.) og Ásta Sigrún fór aftur út til Edinborgar þann 13. Héðan hafa því verið sætaferðir á Keflavíkurflugvöll. Við erum búin að hafa það dásamlegt.

Jóladagarnir voru náttúrulega þétt skipaðir af jólaboðum og fjölskylduhittingum og var dagskráin þétt skipuð hjá krökkunum, ekki eins hjá okkur gamla fólkinu. En það verður ekki sagt annað en við höfum notað þær stundir vel sem við áttum saman við leik og spjall. Svo vorum við Maggi svo heppin að fá að passa Hildi Sögu nokkur kvöld sem var bara dásamlegt. Hún er nú ótrúlega gott barn, litla sílið sem sér okkur nánast eingöngu sem "Skype-afa og ömmu". Ég held að hún sé bara orðin mikil afa- og ömmustelpa:-)

Hér eru svo nokkrar myndir af henni frá þessum yndislegu dögum okkar hér í Lyngberginu.

Þegar allir voru flognir á brott, fitjaði ég upp á peysu á Hildi Sögu mína. Ég notaði Léttlopa og reyndi að sameina margar hugmyndir, sem ég hef fengið í kollinn þegar ég hef verið að skoða bæði prjónablöð og vefsíður, í peysuna og prjónaði einnig húfu við hana. Ég er bara ánægð með útkomuna og er hún nú á komin í umslag til þeirrar litlu og fer í póst á morgun. Svo bíðum við bara eftir myndum frá Gulla og Söndru af henni í peysunni og húfunni.

Jóla, jóla, framhald

2009-12-06T21:36:00.013Z

Jólaundirbúningur heldur áfram hér í Lyngberginu og er jólakransinn kominn á sinn stað á útihurðinni. Ég var nú í fyrra fallinu með hann í ár þar sem ég var með kvennaboð hér síðasta fimmtudaginn í nóvember. Þá var auðvitað góð afsökun til þess að búa hann til og setja upp.

Það er einnig orðið jólalegt hér innanhúss, aðventuborðið skartar sínu fegursta og ég er farin að tína fram jóladótið svona smátt og smátt til að skreyta með.

Matargerð, bakstur og fleira er í fullum gangi og búið er t.d. að gera kókóskúlurnar sem ekki mega missa sín á aðventunni. Þær eru bara hrein hollusta!! þ.e. ég hakka saman döðlur, gráfíkjur og marsipan, bý til litlar kúlur sem ég velti upp úr bráðnu dökku súkkulaði og svo upp úr kókósmjöli.

Á myndunum hér fyrir neðan má sjá afrakstur síðustu helga, þ.e. kókóskúlur, lifrarpaté, smákökur, laufabrauð sem við skerum alltaf út á Melhaga hjá tengdó og í Fagrabergi með mömmu og pabba. Einnig má sjá chillisultu og biscotti en það fer í körfurnar góðu.

Ég hef einnig setið við saumavélina upp á síðkastið og saumaði þessa poka sem ég ætla svo að fylla með mandarínum, hnetum og sprittkertum handa vel völdum ættingjum í jólagjafir.

Eins og ég sagði í síðasta bloggi, þá er þetta skemmtilegasti tími ársins að mér finnst og ég nýt þess að baka, sauma, prjóna og dunda mér við þetta allt saman. Ásta Sigrún kemur heim í jólafrí á miðvikudaginn og verður nú heldur betur gott að fá hana heim. Við fengum þær fréttir um daginn að litla fjölskyldan í Eskilstuna ætlar að koma og dvelja hjá okkur yfir jólin og þá verður fjör í kotinu. Ég get varla beðið. Kalli okkar útskrifast svo stúdent þann 20. svo það er nóg að gera. Læt þetta nægja í bili.

Jóla, jóla, jóla....

2009-11-16T00:09:00.008Z

Hér í Lyngberginu er jólaundirbúningur í fullum gangi. Þetta er skemmtilegasti tími ársins hjá okkur. Við höldum í hefðir og bætum við og breytum kannski örlítið en eitt breytist ekki, við byrjum snemma og njótum. Eitt af því sem við byrjuðum á fyrir nokkrum árum var að hætta að gefa jólagjafir til fullorðna fólksins í fjölskyldum okkar og færum þeim jólakörfu fulla af heimalöguðu góðgæti. Hér eru nokkur myndbrot af því sem við höfum verið að gera og ætlum að setja í þessar fallegu jólakörfur.

Við Inga (æskuvinkona mín) höfum undanfarin ár soðið niður græna tómata. Þeir eru soðnir í sykri, ediki og kryddi og eru dásamlegir með jólamatnum. Þessi siður er orðinn ómissandi þáttur í jólaundirbúningnum hjá okkur báðum. Svo eru þessar krukkur fallegar í jólakörfurnar.

Appelsínumarmelaði er líka eitt af því sem við búum til fyrir jólin, þó svo að það sé einnig gert á öðrum árstímum. Það fer líka í jólakörfurnar.
Svo er það rúgbrauðið. Hér á þessum bæ er bökuð lifrarkæfa fyrir jólin og þykir ómissandi um hátíðirnar og þá verður að vera til heimasoðið rúgbrauð. Þetta rúgbrauð er soðið í 13 tíma í bakaraofninum og er svo auðvelt að gera. Ættingjar og vinir fá auðvitað lifrarkæfu og rúgbrauð í jólakörfuna.
Nú á aðeins að breyta innihaldi jólakörfunnar. Nú erum við búin að baka hrökkbrauð og hafrakex sem er smá tilbreyting.
Og nú er ísskápurinn að verða stútfullur af allskonar góðgæti handa vinum og vandamönnum, nammi namm.

Saumavélin hefur einnig verið í gangi og er ég að sauma nokkrar jólagjafir og er smá sýnishorn á þessu myndbroti. Sem sagt allt í fullum gangi hér í Lyngberginu og enn er margt ógert sem ég segi frá síðar.

Slökun á Flúðum

2009-11-07T21:25:00.009Z

Undanfarin ár höfum við fjölskyldan farið í bústað í vetrarfríinu. Í ár var vetrarfríið ekki á sama tíma hjá okkur Magga en við létum samt verða af því að fara að Flúðum. Við vorum í bústað í Heiðarbyggðinni og var það ótrúlega gott. Ég föndra yfirleitt jólakortin í þessum ferðum og Maggi hefur oftast nær notað tímann í að líma myndir ársins í fjölskyldualbúmið. Í þessari ferð voru jú jólakortin gerð alls 90 stk. og einnig pakkakortin. Maggi notaði tímann í að læra og einnig í ýmiskonar vinnu fyrir skólann ásamt því að nota heitapottinn reglulega:-)

Á myndinni hér að ofan má sjá nokkrar gerðir jólakorta.

Veðrið var dásamlegt flesta dagana. Á myndunum sést hversu fallegt tunglskinið var, föndurdótið mitt, Maggi í þungum þönkum, "jólamatur" í móanum og bíllin að morgni sunnudags, alhélaður í morgunsólinni. Svona ferðir eru nærandi fyrir andann og sálina og ég tala nú ekki um samveru okkar.

Ein græn og væn .

2009-10-25T19:57:00.007Z

Bara svona að gamni þá set ég inn myndir af Hildi Sögu minni í nýju lopapeysunni sem ég var að klára. Kalli fór í gærmorgun til Stokkhólms á tónleika með Muse og gistir í Eskilstuna hjá litlu fjölskyldunni og fyrst að ferð féll var ekkert annað í stöðunni en klára peysuna. Í mynstrinu áttu að vera ljósbláar klukkur en ég breytti því og notaði fjólubláan lit. Kemur bara vel út.

Sú stutta er nú ekki amalegt módel.
Það er svolítill sláttur á minni á þessari mynd.

Edinborg, yndislega Edinborg

2009-10-15T20:04:00.012Z

Ég er svo lánsöm að Ásta Sigrún mín ákvað fyrir fjórum árum að fara til náms í Edinborg í Skotlandi. Ég hef farið með henni á haustin og aðstoðað hana við að koma sér fyrir á hinum ýmsu stöðum í borginni. Fyrsta árið hennar þá bjó hún í Corstorphine í vestur hluta borgarinnar og síðan í tvö ár á stúdentagarði í Musselburgh sem er í austur hluta borgarinnar og nú í haust flutti hún í The Old town sem er rétt hjá kastalanum. Í þessum ferðum höfum við átt yndislega tíma saman og ógleymanlega. Eins og sjá má á myndunum þá var ýmislegt að gera hjá okkur.

Í september héldum við af stað og vorum ákaflega spenntar að komast í íbúðina. Við höfðum aðeins séð myndir úr henni og vissum svo sem hvernig herbergin litu út en spennan var samt í hámarki þegar við loks komum á áfangastað 32 Buccleuch street. Mete (tyrkneskur strákur (ungur maður)meðleigjandi hennar) tók á móti okkur með kertaljósum og tei sem ég þáði með þökkum enda dálítið lúin eftir ferðalagið. Síðan tókum við til starfa og breyttum uppröðuninni í herberginu eða öllu heldur snérum öllu um 180°, já klukkan var náttúrulega bara að ganga 12 að kvöldi!!! Síðan fórum við að sofa og byrjuðum svo snemma morguninn eftir að þrífa, þvo gluggatjöld og koma dótinu hennar fyrir ásamt því að Ásta Sigrún átti að mæta í skólann. Við hittumst svo í Fort Kinnear og sóttum dótið hennar sem var búið að vera þar í geymslu síðan í febrúar eða frá því hún lagði land undir fót og fór til Ástralíu. Hér fyrir ofan eru svo myndir af herlegheitunum þegar búið var að koma öllu fyrir í herberginu hennar og gera það heimilislegt og fallegt. Íbúðin er ótrúlega skemmtileg, er á annarri hæð í húsi frá því um 1800 og er hátt til lofts og allir gluggar um tveggja metra háir með einföldu gleri, en húsið er friðað svo ekki má breyta útliti þess og þar með töldum gluggum. Viðarhlerar eru fyrir gluggum í herbergjum og stofunni. Fyrir utan herbergi Ástu Sigrúnar, er annað svefnherbergi (fyrir Mete), stofa, eldhús, baðherbergi og lítil geymsla. Hér fyrir ofan eru myndir úr stofu og eldhúsi.

Ásta Sigrún var náttúrulega í skólanum en þess á milli nutum við samverunnar með ýmsu móti, fyrir utan það að þvo þvott og annað sem var búið að vera í geymslunni, eldaði hún handa mér og bjó til yndislegasta salat sem ég hef fengið! Sjáið bara myndina. Við skelltum í gerbollur sem hún gat fryst og átt fram á haustið og fleira og fleira.

Hér fyrir ofan eru myndir af götunni hennar, útsýninu úr herberginu hennar og svo daman sjálf fyrir utan útidyrnar á húsinu hennar.

Í þessari ferð dvaldi ég óvenju lengi með henni úti þannig að við gátum líka gert ýmislegt fleira en hér er sagt frá fyrir ofan. Við tókum t.d. heilan laugardag í göngu um gamla bæinn og eru myndirnar teknar í þeim göngutúr. Þar er t.d. mynd af "útskriftarsal" McEwan Hall, sem tilheyrir University of Edinburg, kastalanum (tekin frá Grassmarket), Viktoria street og The Royal Mile, yndislegt. Það eru forréttindi að hafa fengið að fara í þessar ferðir með henni og við erum búnar að bralla margt í þeim og spjalla og ganga og, og, og, ég gæti endalaust haldið áfram. Takk fyrir samveruna elskan í öllum ferðunum, hvert skyldum við fara næst?

Haustið með kertaljósum inni og úti

2009-10-07T21:32:00.014Z

Já það er fátt eins fallegt og kertaljós þegar fer að rökkva á haustin. Ég skoða margar bloggsíður og þar fær maður heilmargar hugmyndir. Ég á heil ósköp af kertalugtum og kertastjökum og sá um daginn á einni bloggsíðu hvað hægt er að gera skemmtilega hluti á einfaldan hátt. Ég skellti mér til Reykjavíkur í dag og keypti þennan spegil og raðaði svo nokkrum kertalugtum, glösum og fl. á hann og hef hann á borðstofuborðinu og er þetta ekki flott?

Og ekki er það síðra þegar búið er að kveikja á kertunum.

Eða hvað ?
Einnig er ég mjög sátt við þessa uppstillingu.

Við höfum undan farin ár sett kertalugtir út á borð sem er hér á stéttinni fyrir framan húsið okkar. Þar lifa kertaljós nánast alla daga yfir haust- og vetrartímann

Og það er fallegast þegar það er frost og ég tala nú ekki um þegar það snjóar.
Erikur og Silfurkambur lífga upp á.

Þá er hann Kalli minn sáttur.

2009-09-15T00:09:00.004Z

Jæja þá er ég loksins búin með peysuna hans Kalla míns. Hann er búinn að bíða allt of lengi eftir henni. Ég prjónaði hana um verslunarmannahelgina en átti eftir að ganga frá henni, klippa og setja rennilásinn í. Ég er búin að kvíða því að gera þetta því ég hef aðeins einu sinni áður sett rennilás í peysu og var ekkert sérstaklega ánægð með útkomuna. En nú er ég búin og gekk bara nokkuð vel.

Og Kalli minn er sáttur!

Haustið er minn tími!

2009-09-13T17:32:00.010Z

Mér finnst sumarið yndislegt með björtum nóttum og (mis)hlýjum dögum. Mér finnst frábært að ferðast með karlinum mínum og góðum vinum og ég tala nú ekki um þegar börnin koma með okkur. Ég nýt þess að sitja úti á góðum sumardögum og sötra kaffið mitt og jafnvel að taka handavinnuna mína út með mér. En haustið er minn tími! Litirnir í garðinum okkar eru svo ótrúlega fallegir, blóm, tré og runnar undirbúa dvala og tapa laufum og blómknúppum en fegurðin er ólýsanleg. Og nú gefast tækifæri til þess að kveikja á kertum, ég elska kertaljós.

Eins og sjá má á myndinni sem ég er búin að setja í síðuhausinn þá eru litirnir í birkikvistinum fallegir og þessi mynd hér að ofan er tekin nokkrum dögum síðar og ekki eru þeir litir síðri.

Nú hafa haustplöntur tekið við af sumarplöntum og skarta sínu fegursta. Einnig finnst mér skemmtilegt að færa litina inn í hús og búa til skreytingar til að hafa inni við.Í dag hittumst við stór(tengda)fjölskyldan, eins og við höfum gert undanfarið, þ.e. að hittast einu sinni í mánuði í hádegisverð. Við Ásta Sigrún föndruðum ýmislegt úr haustefniviði úr garðinum og sjáið þið bara afraksturinn.

Svo nú eru haustskreytingar út um allt hús hjá okkur í Lyngberginu.

Fallegt ekki satt?

Og svo er náttúrulega búið að búa til rabarbarasultu og rifsið bíður þess að húsmóðirin gefi sér tíma til að gera hlaup úr því.

Það er kominn tími á blogg er það ekki?

2009-09-07T21:06:00.026Z

Ég endaði síðasta (stutta) blogg á því að segja frá því að ég hefði verið í ferðalagi með hópi fólks sem við höfum ferðast með um verslunarmannahelgina undanfarin ár. Þessi hóður samanstendur af æskuvinkonum mínum þeim Ingu og Ellu og fjölskyldum þeirra. Það bætist í hópinn á hverju ári og vorum við sex fjölskyldur í ferðinni að þessu sinni og vorum við þegar flest var 21. Við Maggi lögðum af stað úr Lyngberginu seint á fimmtudeginum og hittum Ingu, Einar, Sigrúnu Ellu dóttur þeirra og Þórhildi (dóttur Ellu og Garðars), Magnús Inga, Siggu og Ingibjörgu litlu dóttur þeirra og Guðmund og Elísabetu (foreldra Siggu), Guðna og Helgu (þeirra börn) og ekki má gleyma Massimo (hundinum þeirra), á Suðurlandsveginum við Rauðavatn. Allir í besta ferðastuði og héldum áleiðis í Hrífunes. Við komum þangað seint um kvöld, eftir hefðbundin stopp á leiðinni. Þar komum við okkur vel fyrir í tjaldvögnum og fellihýsi og áttum notalega stund þar til fólk fór að koma sér í svefn. Á föstudeginum lögðum við í hann austur að Breiðamerkurlóni. Veðrið var nokkuð rysjótt, rigndi dálítið á okkur, en þegar austur kom var hið besta veður og skartaði

lónið sínu fegursta, ég hef sjaldan séð það svona fallegt og stútfullt af ísjökum. Á leið heim stoppuðum við á Kirkjubæjarklaustri og fórum í sund og síðan fengum við okkur hressingu að Kvískerjum.
Þegar heim kom var Hanna (mágkona Garðars) komin með sonum sínum Jóni Arnari og Marteini og voru þau að reisa tjaldvagninn þegar við mættum í "Pottinn" en þar höfum við áður dvalið um verslunarmannahelgi. Um kvöldið var leikið og sungið eins og alltaf í þessum ferðum og spilað á gítara fram á rauða nótt. Um miðnættið bættust svo Kalli, Ásta Sigrún (okkar börn) og Diddi (sonur Ingu og Einars) í hópinn. Mátti varla sjá hverjir skemmtu sér betur, unga fólkið eða gamlingjarnir! Á laugardeginum bættust svo Ella og Garðar í hópinn og var þá lagt af stað upp á hálendið að skoða Lakagíga. Við Maggi höfðum aldrei komið á þetta svæði og var mikil tilhlökkun. Við vorum ekkert sérstaklega heppin með veðrið en það var ótrúlegt hvað birti upp þegar við komum upp á hálendið.
Eins og sést hér á myndinni til hliðar var þetta fríður hópur sem var í þessari ferð og það skemmtilegasta við þessa ferð var hversu mörg ungmenni voru með. Við vorum með 9 ungmenni á aldrinum 14-23 ára, er það ekki bara dásamlegt? Og svo auðvitað litla Ingibjörg 4 mánaða.
Þegar við komum heim á mánudeginum þá skellti ég mér í það að þvo og pakka því ég var á leið til Svíþjóðar til Gulla, Söndru og Hildar Sögu á miðvikudagsmorgninum. Ég reyndar stoppaði í Stokkhólmi á leiðinni til þeirra og náði að hitta Rannveigu samkennara minn og Eyjólf manninn hennar sem þar hafa dvalið frá því í vor. Þeirra dvöl þar kemur reyndar ekki til af góðu því Eyjólfur hefur verið þar vegna mergskipta. Við áttum góðan tíma þar sem við fengum okkur brunch og spjölluðum þessi líka ósköp. Ég rétt náði lestinni til Eskilstuna og var orðin spennt að hitta litlu fjölskylduna. Ég átti frábæra daga með þeim, þar sem dekrað var við mig daginn út og inn. Við fórum í skemmtilega ferð til Trussa (vona að þetta sé rétt skrifað hjá mér), sem er skemmtilegur bær með handverksverslunum í tugatali. Fallegt handverk úr leir og ég tala nú ekki um hör. Sæmundur pabbi Söndru er í Eskilstuna núna og er með bát þar. Hann fór með okkur í bátsferð og er myndin af okkur "ömgunum" tekin þar um borð. Við fórum á ströndina og áttum góðar stundir heima hjá þeim. Ég flaug síðan með þeim til Dublin mánudaginn 5. ágúst þar sem við hittum Þorra bróður og Emmu og sama dag komu mamma, pabbi og Ásta Sigrún frá Íslandi. Tilefnið var brúðkaup þeirra Þorra og Emmu og bættust síðan fleiri fjölskyldumeðlimir í hópinn eftir því sem dagarnir liðu. Berglind, Sigrún og Sæunn komu á þriðjudegi, Maggi, Kalli komu á miðvikudeginum og Ásgeir og Hildigunnur
komu frá New York þann sama dag. Þá vorum við öll saman komin í fyrsta skipti hjá Þorra á heimili hans og Emmu í Dublin og reyndar í fyrsta skipti öll saman í útlöndum. Hópurinn er fallegur hér á myndinni ekki satt? En myndin er tekin á miðvikudagskvöldinu þar sem við vorum í þvílíkri veislu hjá honum en Emma var þá farin til foreldra sinna og ætlaði að gista hjá þeim nóttina fyrir brúðkaupið. Við stelpurnar vorum reyndar búnar að gæsa Emmu á þriðjudeginum og áttum frábæra kvöldstund með vinum hennar og samstarfskonum.
Þorri var að hitta Hildi Sögu í fyrsta skipti og fór vel á með þeim eins og sést hér á myndinni til hliðar.
Það var svo sem ekki að sjá að þau hefðu ekki hist fyrr, enda samskipti auðveld í dag með Skype og annarri tækni.
Á fimmtudeginum vorum við sem gistum á hóteli í Dublin, sótt og fórum öll saman í lítilli rútu til Carton House, en þar fór hjónavígslan fram. Eins og sést á myndinni er þetta ótrúlega

fallegt hús og umhverfið einnig fallegt. Þarna er golfvöllur af stærstu gerð, veitingastaður, hótel og fleira og fleira. Skötuhjúin voru gefin saman í fallegum sal í gamla húsinu og tóku margir af fjölskyldunni þátt í athöfninni með einum eða öðrum hætti, upplestri, tónlist og fleiru. Athöfnin var yndislega falleg og hátíðleg. Eftir athöfnina voru léttar veitingar og svo náttúrulega myndatökur, ég segi tökur þar sem þurfti náttúrulega að mynda hjónin með ýmsum hópum, vinum, ættingjum og öllum saman og svo framvegis. Síðan var matur kl. 6 og stóð veislan fram á nótt með þvílíkum
veitingum, ræðuhöldum, söng og dansi.
Við Maggi stálum síðan Hildi Sögu sem svaf á milli okkar um nóttina í fyrsta skipti vonandi af mörgum. Unga fólkið hélt gleðinni áfram fram á rauða nótt. Og eins og sjá má á myndinni hér að ofan hvarf ekki brosið að nýju hjónunum allt kvöldið. Flestir gestanna gistu síðan á hótelinu um nóttina og hittumst við svo í morgunmat og síðan buðu Þorri og Emma okkur öllum í hádegisverð í golfklúbbnum. Ásgeir þurfti reyndar að taka próf frá því snemma um morguninn og fram á miðjan dag (á netinu). Þetta var endalaus veisla og sögðu margir að þetta væri bara eins og hjá víkingunum forðum. Á laugardeginum buðu síðan foreldrar Emmu og bróðir hennar hann Barry okkur öllum ásamt nágrönnum þeirra og frændfólki Emmu í garðveislu þar sem huggulegheitin og veisluhöldin héldu áfram fram á kvöld. Ásgeir var þá floginn til New York aftur og Hildigunnur til Íslands.
Já þetta verður ógleymanlegt. Við flugum síðan í hinar og þessar áttir á sunnudeginum, við úr Lyngberginu og Berglind og stelpurnar til Íslands, Gulli, Sandra og Hildur Saga til Eskilstuna, Þorri og Emma til Spánar í brúðkaupsferð í viku, en mamma og pabbi urðu eftir í Dublin og skiluðu sér heil heim viku síðar. Ævintýri! já og það af bestu gerð.

Er hún flott eða er hún flott?

2009-08-04T13:49:00.004Z

Þá erum við komin heim úr útilegunni, frábær helgi með frábærum vinum. Ég ætla að segja frá því síðar. Set bara að gamni inn mynd af peysunni úr Kauni garninu sem ég var að prjóna á Hildi mína Sögu. Annað kvöld verð ég komin með hana í fangið. Held af stað til Dublin í fyrramálið með smá stoppi á leiðinni í Eskilstuna!
Meira seinna t.d. lopapeysa á Kalla sem ég kláraði í útilegunni, á bara eftir að ganga frá endum og setja rennilás í hana. Hún er bara nokkuð snotur. Meira seinna.

Þá er nú orðið ansi tómlegt hérna hjá okkur.

2009-07-18T22:17:00.022Z

Þá er litla fjölskyldan farin aftur til Eskilstuna. Við erum búin að eiga ógleymanlegar stundir saman undanfarnar þrjár vikur en mér finnst tíminn hafa rokið áfram. Eins og ég var búin að segja frá áður, þá fórum við með þeim á Snæfellsnesið og áttum góðan dag þar.

Við fórum síðan á Akureyri í tvo daga þann 8. og 9. júlí. Gulli og Sandra bjuggu í þrjú ár fyrir norðan og útskrifuðust frá HA 2002 og giftu sig sama sumar í Grundarkirkju í Eyjafirði. Síðan lá leið þeirra til Svíþjóðar þar sem þau hafa búið síðan við nám og störf. Það var gaman að fara með þeim norður. Miklar breytingar hafa átt sér stað á Akureyri frá þeim tíma er þau bjuggu þar, heilu hverfin hafa risið og fl.

Við litum við hjá Kristni og Siddý í kvöldkaffi og einnig komu Helga Dröfn og Lalli í örheimsókn til okkar í litlu íbúðina í Hafnarstrætinu (sem er bara dásamleg svona fyrir eina nótt, leigð út af KÍ).

Ég notaði tækifærið og fór í Quiltbúðina á Akureyri og verslaði mér þar garn (Kauni) og uppskriftir fyrir það í peysu á mig og einnig í peysu á Hildi Sögu sem er langt komin eins og sést á myndinni hér til hliðar. Skemmtilegt að prjóna hana þar sem byrjað er á hálsmáli og prjónað niður. Ótrúlega skemmtilegt að prjóna úr þessu garni þar sem einn litur rennur saman við annan og veit maður varla hvað tekur við. Einnig keypti ég í bútasumsveggteppi fyrir Hildi Sögu (sem er ekki á dagskrá að sauma fyrr en í haust þegar ég fæ herbergið hennar ÁSM aftur). Skemmtileg búð Quiltbúðin og mæli ég með því að koma þar við þó ekki sé nema til að sjá öll teppin sem hanga þar og aðra handavinnu. Í búðinni er einnig hægt að fá alls konar smáhluti eins og tölur og fl.

Gulli varð þrítugur þann 12. júli og voru tvær veislur þann 11. Fyrri var haldin í þessu líka frábæra veðri í hádeginu og síðan komu vinirnir um kvöldið. Við sátum hér úti fram á rauða nótt við eld í arni og spjall með góðar veigar.

Það er langt síðan ég færði inn pistil hér og hefur eins og að framan sést ýmislegt á daga okkar drifið. Við vinkonurnar hittumst alltaf í Sléttuhlíð einu sinni á sumri og gerðum við það núna um miðjan mánuðinn og áttum frábæran dag saman. Við Inga gengum upp eftir og vorum aðeins eina klst. á leiðinni í þvílíkum hita að það lak af okkur þegar við komum.

Síddý og Brynhildur dótturdóttir hennar komu einnig við hjá okkur og var gaman að fá að sjá þá stuttu sem er tæplega 10 mánaða dugnaðarforkur.

Ásta Sigrún er komin heim (jei, jei, jei!!!) og er alsæl með hálfa árið sitt í Melbourne, Ástralíu. Hún var 36 klukkustundir á leiðinni heim, ég hefði ekki getað þetta að ég held. Það er yndislegt að vera búin að fá hana heim. Hún náði aðeins nokkrum dögum með litlu fjölskyldunni en náði þó að fara með þeim á Harry Potter myndina ásamt Kalla og Söru. Þá vorum við afi Maggi að passa og var sú stutta bara ánægð með okkur.

Búið er að mynda okkur Ingu með litlu ljósin okkar eins og sjá má. Og einnig kom sú stutta í heimsókn með Ingömmu svo Ásta Sigrún gæti séð hana.

Eins og ég sagði ofar þá er ég að komast aftur í prjónastuð og einnig skellti ég í Chilli-sultu áðan, hún er svo falleg, bæði í pottinum og krukkunum (ha,ha,ha).

Jæja ætli ég láti þessu ekki lokið. Við sitjum hér ein við Maggi, hann með gítarinn og ég tölvuna, það er ósköp rólegt hjá okkur en krakkarnir eru væntanlegir en það vantar litlu fjölskylduna frá Eskilstuna og þá er svo tómlegt

Tíminn líður hratt....

2009-07-04T21:23:00.014Z

Hildur Saga 1. árs 27. júní 2009

Já, að hugsa sér, heil vika liðin og rúmlega það frá því að Gulli, Sandra og Hildur Saga komu til landsins. Við erum búin að eiga svo frábæran tíma með þeim. Þau dvöldu hjá okkur fyrstu dagana, svo var haldið upp á eins árs afmæli frökenarinnar og svo hafa þau verið svo yndisleg að koma við hjá okkur og einnig að deila með okkur dögum hér á veröndinni í bíðskaparveðri og svo fórum við í frábæra dagsferð á Snæfellsnesið á fimmtudaginn.

Við fórum að Búðum og fórum í fjöruna þar sem Hildur Saga rótaði í sandinum og skreið um. Síðan fórum við á Arnarstapa að fuglabjarginu og fengum okkur nesti. Yndislegt að vera úti í náttúrunni og njóta. Hildur Saga er ótrúlega fljót að aðlagast breyttum aðstæðum, brosir við öllum þessum ættingjum sem hún hefur nú séð lítið af fram að þessu og er til í að brosa endalaust til okkar.

Við Maggi fengum að passa hana í gærkvöldi og er ótrúlegt hvað hún er örugg með sig, kvaddi foreldra sína og lék við okkur fram eftir kvöldi. Sú stutta ætlar að líkjast föður sínum að einu leiti, það er hægt að færa hana sofandi milli bæja án þess að hún rumski. Hún sofnaði hjá okkur um kl. 9 og þegar Gulli og Sandra komu að ná í hana um kl. ellefu, þá var hún enn sofandi og var klædd og færð í bílstólinn, borin út í bíl og keyrð heim án þess að rumska. Já hún er afar gott barn. Nú finnst mér tíminn líða allt of hratt og það saxast á dvöl þeirra hér á landi í þetta skiptið. Við ætlum samt að reyna að komast með þeim norður á Akureyri í vikunni og svo verður Gulli þrítugur 12. júlí og verður bæði brunch og partí þann 11. hér í Lyngberginu og hlökkum við mikið til. Svo kemur Ásta Sigrún heim þann 14. og þá verður nú fjör í Lyngberginu. En nú er að njóta tímans sem eftir er af heimsókn þeirra.

Það styttist í að litla fjölskyldan frá Eskilstuna komi:-)

2009-06-23T23:28:00.014Z

Það er lítið að gerast þessa dagana. Ég er rétt að komast í gang eftir að hafa notið þess að gera sem minnst!
Á föstudaginn koma þau svo til landsins
Gulli, Sandra og Hildur Saga og erum við mjög spennt. Litla daman verður síðan eins árs á laugardag og verður afmæli fyrir hana á sunnudaginn og fannst mér best að fara að bretta upp ermar og njóta þess að byrja að baka fyrir afmælið.
Heyrði í Ástu Sigrúnu í morgun og er hún spennt að leggja í hann í ferðalagið sem hún fer í 1. júlí og ætlar að vera á ferðinni í 9 daga með vinkonum sínum. Ekki leiðinlegt að ferðast um austurströnd Ástralíu (reyndar bara lítinn part af austurströnd þessa stóra lands) og upplifa eitthvað sem hefur verið draumur hennar frá því að hún var lítil stelpa. Hún ætlar t.d. að fara að snorka við kóralrifið fræga. Svo kemur hún heim (húrra, húrra) 14. júlí og nær að hitta litlu fjölskylduna frá Eskilstuna. Það verður frábært að fá eðlilegt hljóð í húsið með alla fjölskyldumeðlimi í því á sama tíma.
Þessi síða átti í upphafi að vera um handavinnu og fl. og hefur nú lítið farið fyrir slíku upp á síðkastið. Ég er þó búin að prjóna 2 húfusett eins og sést hér fyrir ofan því nú fer að líða að því að barnabarn Ellu og Garðars fæðist.

Og svo er ég búin að prjóna húfu á Hildi Sögu fyrir haustið en þá byrjar hún í leikskóla litla sílið. En núna hlakka ég til að fá að finna hana í fanginu og fá að njóta nokkurra daga með henni og foreldrunum.

Sumarfrí, sumarfrí, sumarfrí, frí, frí...

2009-06-16T21:35:00.029Z

Ja hérna hér. Ótrúlega finnst manni tíminn líða
þegar maður lítur til baka yfir veturinn. Mér finnst eins og það hafi bara verið mánudagar og föstudagar í vinnuvikum vetrarins. En nú er sumarið komið og tími til að njóta. Það tekur mig alltaf smá tíma að ná mér niður eftir veturinn og fara að njóta þess að vera í fríi.
Mér finnst ég þurfa að gera svo margt sem ég hef ýtt á undan mér eins og alls konar þrif, helst að mála (mjög vinsælt eða þannig hér á þessu heimili!) taka til í skápum og viðra og og og...
Nú er þriðji í fríi og ég ekki farin að gera nokkurn skapaðan hlut nema að reyna að komast niður úr hrúgunni í þvottahúsinu hm..

Reyndar erum við Inga vinkona búnar að setja okkur
það markmið að ganga hressilega á morgnana í sumar (það er sko tekið á því) og byrjuðum heldur betur vel, fórum bæði í gær og í dag kl. 9 (óguðlegur tími svona í sumarfríi) en við erum góðar þegar við tökum okkur til.

Í dag á Ásta mín afmæli og reiddi fram kökur og krásir og ligg ég nú á meltunni eftir herlegheitin.

17. júní á morgun og ekki verður mér mikið úr verki þá. Við kíkjum í bæinn og auðvitað til mömmu og pabba í pylsur og hamborgara eins og venjulega standandi kræsingar á þeim bæ. Ég vona bara að veðrið verði ekki eins og á myndinni hér fyrir ofan, sem ég tók á laugardaginn úti á stéttinni við húsið okkar. Er reyndar að horfa á veðurfréttir sjónvarpsins og viti menn þeir spá rigningu:-(

Það er eins gott að geta þess að fánamyndin er tekin af vef Skýrr.

Það er nóg að gera!

2009-06-08T20:57:00.017Z

Það er nú orðið langt síðan ég bloggaði síðast. Síðustu vikur hafa verið frekar strembnar, prófabunkarnir stórir og naut ég þess nokkra daga að veðrið var þannig að ég gat farið yfir þau úti í sólinni. Það vill til að mér finnst gaman að fara yfir próf og gaf mér góðan tíma til þess. Síðasta vika var svo brotin upp með skemmtilegum vordögum þar sem þemað var umhverfið og mannúðarstörf.Nú er ég búin að setja niður nokkur sumarblóm. Mér finnst þessi árstími yndislegur. Við Inga vinkona skelltum okkur í Hveragerði og keyptum nokkur sumarblóm til að setja niður einnig keypti ég nokkur fjölær og ætla að vona að þau dafni vel og nái von bráðar að hylja beðin hjá okkur, ekki veitir af.

Við Maggi fórum í heimsókn til Eika og Þrúðu í sumarbústaðinn þeirra í Þrastarskógi og áttum ánægjulegt kvöld með þeim. Eiki klikkar ekki við grillið!
Um helgina vorum við svo boðin í skírn hjá Magnúsi Inga og Siggu og var sú stutta skírð Ingibjörg í höfðuðið á ömmu sinni. Amman (og náttúrulega allir viðstaddir) ljómaði af gleði. Yndislegt veður og frábær veisla.
Það er útskrift í Setbergsskóla á morgun. Nemendur 10.bekkja kveðja okkur og verð ég að segja að ég mun sakna þeirra. Þessir nemendur sem ég hef kennt undanfarin 3 ár eru frábærir og finnst mér það hafa verið forréttindi að hafa fengið að kenna þeim.
Það gengur lítið með hannyrðir þessa dagana þó svo að það sé alltaf eitthvað á prjónunum það tekur því varla að segja frá því. Kannski næst.

Hafið þið séð annað eins?

2009-05-28T16:19:00.004Z

Þessar rósir fékk ég á föstudaginn í síðustu viku. Þær eru svo fallegar. Í gær skipti ég um vatn á þeim og þær halda bara áfram að blómstra og gleðja okkur.

Góð helgi með góðu fólki

2009-05-24T20:59:00.005Z

Helgin hefur verið viðburðarík hjá okkur. Útskrift á föstudaginn hjá Kristjáni frænda í FB og veisla á eftir og síðan útskrift Kristins og Ingibjargar á laugardaginn og veisla í Sléttuhlíð. Veðurblíðan einstök þrátt fyrir spá um rigningu og leiðindi. Í morgun tókum við það rólega og sváfum lengi og engin skipulögð dagskrá fyrir daginn. Þá er upplagt að byrja daginn með nýbökuðum rúnstykkjum og góðu áleggi.

Ég tók þessar myndir hér ofar og þessa fyrir neðan í dag og sést vel á þeim hversu aspirnar í bakgarðinum eru háar. Þær eru mun hærri en hæsti punktur hússins okkar. Ótrúlegt að hugsa til þess að þær eru ekki nema um 15-16 ára. Þær eru örugglega þremur til fjórum metrum hærri en húsið.

Garðurinn okkar 19. maí 2009

2009-05-19T21:25:00.006Z

Þessi mynd er fyrir Ástu Sigrúnu og Gulla. Fuglahúsið sem þau fengu í jólagjöf eitt árið. Það verður fallegra og fallegra með hverju árinu sem líður þó það láti á sjá vegna veðurs.

Hér eru nokkra myndir af blómunum sem eru í garðinum okkar.

Kornblóm á efri myndinni og Lyklar (sem ég man ekki hvað heita) á þeirri neðri.

Þessar klukkur eru af laukum sem ég fékk úr garði við Hellisgerði.

Svo að lokum eru það knúpparnir á koparreyninum. Koparreynirinn er uppáhalds runninn minn í garðinum okkar. Á haustin þegar hvítu berin koma á stilkana af blómunum og hann logar af haustlitum þá finnst mér hann fallegastur.

Garðurinn okkar í maí 2009

2009-05-16T21:22:00.006Z

Hér eru nokkrar myndir klipptar saman í eina. Þetta eru dásamlegar plöntur í garðinum okkar, sannir vorboðar. Allt er að lifna við og yndislegt að fylgjast með því. Loksins er veðrið orðið nokkuð vorlegt, segi ekki sumarlegt þó svo að hitinn hafi stigið í dag. Nú eru vorverkin hafin og við búin að setja okkur í stellingar við þau. Í dag byrjuðum við aðeins að taka ofan af beðum og bæta við mold í beðin. Mikil vinna sem bíður okkar og vonandi helst þetta veður!! Á myndinni sjáið þið efst Kúrileyjakirsið, Gullhnapp og Silfurkamb (sem lifði af veturinn). Í miðjunni er einn af lyklunum okkar og síðan Koparreynir og Animóna og í neðsturöð er Kóngafífill og Kornblóm. Munið að ef þið viljið sjá myndina betur þá smellið á hana.

Peysa fyrir haustið.

2009-05-12T22:55:00.004Z

Ég byrjaði á peysu úr lopa-ligth í haust, hef verið að prjóna hana svona inn á milli annarra verkefna. Nú er ég búin með bakstykkið og framstykkin og er mikið að hugsa um að leggja henni þar til seinni part sumars. Þetta verður fín peysa í svalt haustið , hneppt að framan.

Uppskriftin er í gömlu blaði frá Ístex og nota ég hana að mestu leyti þ.e lykkjufjölda og snið. Ég ætla svo að nota uppskrift af ermum og ermaísetningu úr nýjasta Tinnublaðinu og geri frekar ráð fyrir að nota þá uppskrift einnig fyrir hálsmálið. Á myndinni sýnist peysan grá en er í rauninni grágræn. Nokkuð fallegur litur. Síðan fylgir sjal með sem ég er með ljósgrátt. Sjáum til hvað ég geri.

Góður sunnudagur

2009-05-10T19:58:00.016Z

Sunnudagar finnst mér frábærir. Og í dag var engin undantekning þar á. Ég bjó til ógeðsdrykkinn minn!!! Já, það er ótrúlega góður djús frá henni Sollu hollu. Ég set: 1 stóra agúrku, 2 stöngla af selleríi, 4 stilka af myntu, 3 sm. af engifer (afhíða), 1 lime (taka börkinn af og passa að hvítakjötið fari vel með berkinum), 1/2 tsk. af Himalayasalti og 2,5 dl. af vatni, í blandara og læt ganga í góða stund eða þar til allt er orðið vel maukað. Stundum sigta ég djúsinn en oft hef ég hratið með. Þetta er ótrúlega gott og ég tala nú ekki um hollt.

Þegar við vorum að fá okkur morgunmatinn í morgun uppgötvaði ég að appelsínu- marmelaðið var að verða búið eins og við bjuggum mikið til fyrir jólin. Þá var ekki annað að gera en búa til meira. Okkur þykir þetta marmelaði það allra best sem við fáum. Uppskriftin er þessi:

Appelsínumarmelaði.

1 kg. appelsínur

1 sítróna

800 gr. sykur

Skera ávextina í báta og hakka vel í hakkavel. Allt sett í pott og sjóða í 20 mínútur. Síðan sett í krukkur og fylla allveg upp og loka strax, þá lofttæmast þær vel. Auðvelt, fljótlegt og gott.

Bananamúffur

2009-05-09T21:28:00.008Z

Eins og sjá má hér að neðan er ég búin að fá eitt leikfangið enn. Það er forrit til að breyta myndum á ýmsan máta. Ég er búin að vera að leika mér í kvöld og þetta er útkoman, mynd af nýbökuðu bananamúffunum mínum.Eins og ég hef sagt áður, þá á ég mjög erfitt með að henda mat. Það gerist oft á þessu heimili að sumt borðast mjög vel en annað verður útundan. Þegar ávextir eða mjólkurvörur eiga í hlut þá finnst mér mjög auðvelt að nýta þessar matvörur t.d í brauð eða kökur. Oft verða þó muffur fyrir valinu. Í gær voru þrír kolsvartir bananar í skálinni í eldhúsinu. Ég stappaði þá í mauk og notaði þá í bananamúffur. Hér kemur uppskriftin

Bananamúffur

3 mjög vel þroskaðir bananar maukaðir

200 gr. hrásykur (fínn)

2 egg

1,5 dl. ab-mjólk

2 tsk. vínsteinslyftiduft

1 tsk. vanilludropar

260gr. fínmalað spelt

20 gr. suðusúkkulaði spænir

Þeyta saman egg, bananamauk, sykur og ab-mjólk. Blandið því næst þurrefnunum saman við (muna að hræra ekki heldur velta deginu saman). Setja deigið í smurð múffuform og bakað við 200°C í 20-25 mínútur. Verði ykkur að góðu

Húfusett fyrir lítinn herramann.

2009-05-08T21:41:00.008Z

Ég prjónaði þetta sett fyrir Kalla til að gefa Silju Úlfars. Hún eignaðist lítinn prins í gærkvöldi.

Svona lítur pakkinn út og svo bjó ég líka til kort fyrir hann. Það sést ekki nógu vel á myndinni en það er eins og lítill barnasokkur í laginu.

Jæja þá er óhætt að sýna herlegheitin!!

2009-05-07T18:19:00.018Z

Jæja þá er bókin hennar Guðrúnar Erlu komin út í Bandaríkjunum og mér þá óhætt að opinbera herlegheitin. Fyrsta myndin er af tveimur blokkum úr löbernum. Þessi löber er saumaður beint á bak og vatt (svona fyrir þá sem skilja, það er ekki langt síðan ég uppgötvaði hvað það þýðir:-))

Efnin eru hönnun Guðrúnar Erlu. Ég pantaði pakkann fyrir námskeiðið og eins og ég hef áður sagt eru þetta ekki beint lítir sem ég hefði valið sjálf.

En hann er nú bara ljómandi fallegur þar sem hann er kominn á fína "buffetið" hennar ömmu minnar Siggu, í stofunni okkar.

Eða hvað finnst ykkur?

Nú svo er það "Flóafárið". Þetta er teppið (eða öllu heldur yfirborðið). Þetta var verkefnið þar sem við vissum ekkert hvað við vorum að gera. Fengum bara vísbendingar eina af annarri og héldum á vit hins oþekkta og óvænta.
Eins og ég sagði frá eftir námskeiðið, þá var ég nú ekki eins fljót að vinna eins og hinar konurnar en ég er þó búin með þetta!

Nú á ég bara eftir að ákveða hver af þessum litum (sem ég á eftir að sættast við) gæti notast sem kantur utan um teppið og kaupa það ásamt efni í bak og bindingu. Ég held að þetta geti bara orðið sætt í sófann hér í holinu okkar. Gott fyrir "suma" að kúra undir því á meðan horft er á sjónvarpið.

Frábær helgi á Flúðum.

2009-05-05T22:39:00.011Z

Það er ekki margt sem jafnast á við góða helgi í sumarbústað, þegar líður á veturinn. Við Maggi og krakkarnir höfum haft það fyrir sið að fara í sumarbústaðaferðir fyrir jólin og þá tökum við eitthvað skemmtilegt með eins og gítarinn, nótur, bækur og föndur í jólakortin og ég tala nú ekki um eitthvað gott að borða. Þessar ferðir hafa verið frábærar fyrir sálina, hugann og ég tala nú ekki um samveru fjölskyldunnar. Nú erum við færri í ferðum oft á tíðum bara við tvö við Maggi. Nú erum við að komast upp á lagið með að fara í vorferðir líka. Um síðustu helgi, sem var löng þar sem 1. maí var á föstudegi, fórum við á Flúðir. Við vorum orðin mjög þurfandi fyrir að komast úr stressi og krepputali og njóta þess að slaka á, hvíla okkur og njóta kyrrðarinnar. Kalli var á Akureyri að keppa til úrslita í Íslandsmótinu (þeir unnu gott fólk, klárir strákar) og fórum við af stað strax eftir vinnu á fimmtudegi. Þó svo að aðaláherslan væri lögð á hvíld þá tókum við með okkur verkefni til að vinna. Maggi tók með sér lærdóminn og ég ritgerðirnar sem ég er búin að vera að ýta á undan mér í of langan tíma (og tókst að klára yfirferðina) og auðvitað voru prjónarnir með.
Á föstudeginum komu svo Kalli og Sara í heimsókn til okkar og voru til laugardags.

Sara notaði tímann til að lesa undir íslenskupróf sem hún fór síðan í á mánudaginn.

Og Kalli, já próf??? Fótbolti, handbolti, körfubolti í sjónvarpinu og maður lætur slíkt ekki fram hjá sér fara. Við nutum öll ferðarinnar, hvíldarinnar og heita pottsins:-) og ég tala nú ekki um matar.

Maggi er að undirbúa matartilbúninginn á þessari mynd og sjá hvað hann er glaður. Eins og ég sagði áðan þá var þessi ferð frábær og gaman að fá krakkana í heimsókn og sjá þau ná að slaka aðeins á líka.

Við komum við í Melbænum í afmæli hjá Árna Hlyni á leiðinni heim. Alltaf notalegt að koma þangað og afmælisbarnið alsælt.

Þegar við komum heim þá blasti þetta við. Kúrileyjakirsið að komast í blóma. Ég ætlaði ekki að trúa mínum eigin augum. Og kemur það til með að blómsta í örugglega tvær vikur í viðbót.

Og nú eru Lyklarnir mínir að byrja að springa út og þessi er að ná fullum blóma eins og sjá má hér að neðan.

Eins og sjá má hér að ofan var helgin frábær, (þó svo að veðrið hefði mátt vera betra, við fengum rigningu, haglél, rok, o.s.frv. en hvað með það) og heimkoman dásamleg og hversu þurfandi sem maður er fyrir að komast úr bænum þá er alltaf jafngott að koma heim.

Sætt í pakka handa sætri prinsessu

2009-04-26T22:43:00.001Z

Það held ég að hann Kalli verði glaður :-)

2009-04-26T15:41:00.008Z

Svona skó sá ég á heimasíðunni hennar Hellenar og ákvað að prjóna eina slíka handa litlu Magnúsar og Siggudóttur. Ég ætla nefnilega að kíkja í heimsókn til þeirra í vikunni og taka litlu prinsessuna út, skilst að hún dafni heldur betur vel.

Tómatar eru eitt af því besta sem ég get hugsað mér og nota þá með öllum mat og ég tala nú ekki um salöt. Hún Ásta, tengdamóðir mín segir að það eigi aldrei að geyma tómata í ísskáp, heldur á eldhúsborðinu í góðri birtu eða jafnvel úti í glugga, þá verði þeir rauðir, sætir og safaríkir. Eru þeir ekki flottir þessir plómu- og kirsuberjatómatar í eldhúsglugganum?

Í morgun komst ég að því þegar ég leit inn í ísskápinn að ferna með bláberja Húsavíkurjógúrt hafði gleymst aftast í honum. Útrunnin fyrir all nokkru og það veit á aðeins eitt, hún verður ekki snædd!! Ég tók mig því til og bakaði muffins úr henni, en ég á mjög erfitt með að henda mat og gat þannig nýtt þessa líku fínu bláberjajógúrt.

Uppskriftin er þessi:

255 gr. spelt (fínt)

2 tsk. vínsteinslyftiduft

1/2 tsk. salt

140 gr. hrásykur (fínn)

1 egg

3 dl. bláberjajógúrt

Blandið öllum þurrefnum saman og hrærið síðan jógúrt og eggi saman og hræran síðan sett út í og hræra mjög varlega, í raun bara velta þessu saman. (ég setti u.þ.b. 30 gr. af suðusúkkulaði út í)

Síðan er degið sett í muffinsform eða svona líka flott form eins og við Maggi eigum frá ömmu hans og afa, og bakað við 190°C í 25 mínútur (undir og yfirhiti ekki blástur) í miðjum ofni.

Nú er Kalli að keppa úrslitaleik með 2. flokki FH og best að fara að koma sér á staðinn. Það held ég hann verði glaður þegar hann kemur heim í ilminn af nýbökuðum "bláberja"muffins.

Vorið er komið í garðinn okkar

2009-04-25T21:13:00.007Z

Jæja þá er vorið komið í garðinn okkar. Mér finnst stutt í sumarið þegar Kúrileyjakirsið okkar fer að bruma og skjóta út blómknúppum sem eiga síðan eftir að blómstra fyrir okkur langt fram í júní. Er það ekki fallegt?

Páskaliljurnar komnar vel af stað og eru svo yndislegar þegar gengið er upp að húsinu.

Í garðinum okkar í Corbridge voru laukar sem okkur fannst svo fallegir þeir heita Snow drops. Ég rakst síðan á þessa tegund í Garðheimum fyrir tveimur árum og setti niður. Í fyrra komu einir þrír upp og nú eru þessir komnir upp og blómstra heldur betur, hvít blóm á löngum stilki.

Og auðvitað reyndum við að gera páskalegt hjá okkur í apríl og keyptum þessar páskaliljur til að hafa við innganginn. Þær eru ótrúlega harðgerðar, eins og veðrið er búið að vera leiðinlegt þá standa þær sig ótrúlega vel.

Við erum búin að klippa allan trjágróður og runna í garðinum. Það er samt mikil vinna sem bíður okkar. Ég er samt frekar varkár með vorverkin þar sem maður veit aldrei hvort við fáum hret eða ekki. Við bíðum alla vega með að taka ofan af beðum og annað þar til eftir miðjan maí. Þá tæmum við safnkassana og fáum fína mold í beðin. Einnig ætlum við að tyrfa á ýmsum stöðum í garðinum þetta sumarið og reyna að minnka beðin.

Ný della ha, ha, ha....

2009-04-21T16:18:00.008Z

Jæja er ný della í uppsiglingu hjá mér? Nei, nei það er bara svo skemmtilegt að búa til hluti og ég tala nú ekki um þegar vel tekst til. Síðasta daginn í páskafríinu skelltum við okkur í bæinn ég og hún mamma mín. Við ákváðum að labba Skólavörðustíginn og skoða allar þessar fínu hönnuði sem þar hafa hreiðrað um sig. Við fórum á Mokka og fengum okkur kaffi og vöfflur og áttum þarna frábæran dag þar sem endalaust augnakonfekt bar fyrir. En á þessari leið okkar fórum við fram hjá versluninni Litir og föndur og fórum þar inn. Þá datt ég í deildina með öllu þessu fallega dóti til skartgrípagerðar og viti menn, ég datt í það!!!

Það sem hér á eftir kemur er svo það sem er tilbúið úr því efni sem kom heim úr þessari ferð okkar mæðgna. Þessir eyrnalokkar eru náttúrulega í mínum litum þ.e. silfur og svart:-)

Ég er líka alltaf að reyna að vera djörf og fannst ég virkilega vera það þegar ég valdi þessar rauðu kúlur sem eru handútskornar.

Og svo er bara að láta hugmyndaflugið ráða ferðinni. Þessir lokkar eru allir stakir. Mér finnst mjög skemmtilegt að vera með einn lokk sem er dálítið töff á móti litlum lokkum sem láta lítið yfir sér. En sem sagt hér er afrakstur helgarinnar og hvorki meira né minna en tvö blogg í dag þrátt fyrir magakveisu.

Þá er hann tilbúinn og brauðkörfuklútur í stíl!

2009-04-21T16:11:00.004Z

Jæja þá er hann tilbúinn og tókst bara vel. Hann er reyndar aðeins minni en ég ætlaði í byrjun en hann er snotur og fínn.

Ég átti nokkurn afgang af efnum svo ég saumaði lítinn brauðkörfuklút til að hafa með dúknum.

Er þetta ekki bara flott komið á borð? Nú er bara að pakka herlegheitunum og koma því í póst til Eskilstuna þar sem nýtt borð úti á palli bíður eftir þessu.

Sumardúkurinn góði

2009-04-18T23:04:00.008Z

Jæja þá er ég búin með blokkina sem ég ætla að hafa á miðjunni á dúknum, bara nokkuð sátt nema með miðjuna :-( finnst hún dálítið úr lit. Er þetta kannski páskadúkur? Nei er það?

En nú er bara spurning hvort ég noti þetta efni til þess að hafa utan með? Mér finnst það mjög fallegt en ætla að sofa á því í nótt. Hvað finnst ykkur sem kannski lesið þetta?

Sumardúkur

2009-04-18T18:20:00.004Z

Jæja þá er að hefjast handa. Mig langar svo að sauma sumardúk. Sólarlegir litir er það ekki í bland við græna sumarlega. Mér áskotnaðist forrit til þess að búa til mynstur og er búin að sitja við það núna undanfarna daga, það er að læra á forritið og síðan að hanna mynstur.
Dúkurinn á að vera um 70 x 70 sm. Aldrei að vita hvernig þetta verður hjá mér.

Jarðarberjastelpan hennar ömmu sinnar og fl.

2009-04-13T17:22:00.018Z

Er hún ekki dásamleg elsku litla stúlkan mín í jarðarberjapeysunni sinni. Hún passar vel á hana heldur ermasíð en hún á eftir að vaxa í hana.

Var að fá þessar myndir af Hildi Sögu. Þarna er hún á leikvellinum og komin í vestið. Það virðist passa vel á dömuna. Er hún ekki bara fallegust?

Fallega fjölskyldan í Eskilstuna. Þarna eru þau öll Sandra, Hildur Saga og Gulli, öll í lopapeysum sem ég hef prjónað á þau í gegnum tíðina. Myndin er tekin í garðinum þeirra, þennan dag var um 19°hiti og þau grilluðu og borðuðu úti um kvöldið ásamt þremur systrum Söndru og einum mági.

Og svo er það löberinn góði. Ég skar fyrst ferningana 2,5" X 8" og þeir voru allir saumaðir saman í eina lengju. Síðan er saumað beint á vatt og bak og þarna er ég búin með yfirborðið

Ég var mjög spennt að sauma löberinn og kláraði að sauma kanntana og setja bindinguna á hann í gær og gekk svo frá bindingunni í dag og svona lítur hann út.

Hér er hann svo kominn á skápinn í holinu hjá okkur. Ég ákvað að setja ekki blómin á hann, finnst það of mikið skraut. Kannski geri ég það seinna, hver veit?

Næst á dagskrá...

2009-04-07T23:54:00.011Z

Jæja þá er ég búin með yfirborðið á teppinu góða sem ég byrjaði að sauma á námskeiðinu á Selfossi. Það er mjög fallegt miðað við litavalið sem var alls ekki mitt og ég hefði aldrei látið mér detta í hug að kaupa þessa liti í það, kemur mér skemmtilega á óvart. Ég ætla aðeins að hvíla mig á því og setja það saman eftir páskana, vantar að kaupa vatt og efni í kantinn, bindinguna og bakið. Læt það bíða aðeins. En...þessi fallegi löber er næstur á dagskrá hjá mér. Hann er hannaður af Guðrúnu Erlu sem var með námskeiðshelgina góðu.

Hann er saumaður beint á bak og vatt og eru þetta efnin sem ég valdi í hann. Ljósu efnin í yfirborðið og það dökka í kantinn, bakið og bindingu og það græna, rauða og gula í applikeruðu blómin. Hlakka til að byrja á honum.

Ég skrapp í Bóthildi í kvöld og keypti mér þessi efni. Er ekki enn búin að ákveða í hvað ég nota þau en mig hefur lengi langað í bláa og rauða liti. Það er ekki sérlega auðvelt að fá bláa liti en hún frú Bóthildur á bláa liti í hillutali!

Það verður spennandi að finna fallegt mynstur eða láta sköpunarhæfileikana (sem eru ekki að angra mig mikið þessa dagana) ráða. Kannski kemur andinn yfir mig. En fyrst er að klára löberinn og ganga frá teppinu. Nóg að gera í bili. (Ef smellt er á myndirnar sjást þær stærri og mynstrin í efnunum sjást betur)

Það passar örugglega er það ekki?

2009-04-04T20:58:00.003Z

Jæja þá er vestið tilbúið þvegið og pressað! Það sem ég gerði var að minnka prjónastærðina um 1/2 númer og sleppa þremur umferðum í mynstrinu og fækkaði lykkjum í uppfiti í ermagatinu um 8 lykkjur (þá duttu tvö mynstur út) annað ekki og sjáið stærðarmuninn. Það minna er ég viss um að passar Hildi Sögu núna og þá á hún hitt þegar hún stækkar eða bara gefur það einhverjum. Smart er það ekki?

Lopavesti úr einföldum plötulopa

2009-03-31T12:47:00.002Z

Þetta lopavesti var ég að klára á Hildi Sögu. Það er prjónað úr einföldum plötulopa. Ég er þó dálítið hrædd um að það sé of stórt á hana og er að hugsa um að prjóna annað og minnka uppskriftina eða prjónana. Uppskriftin er í bókinni Lopi nr. 28. Ég notaði uppskrift af peysu og sleppti bara ermunum. Sé til hvað ég geri, ætti samt að geta klárað það áður en Elsa fer út.

Jarðarberjapeysa handa Hildi Sögu

2009-03-29T21:33:00.003Z

Jæja þá er þessi tilbúin fyrir litluna mína í Eskilstuna. Ég keypti uppskrift og garn í sumar í þessa peysu og húfu. Ég notaði Dala garn og uppskriftin er úr blaði frá Dala. Það var mjög skemmtilegt að prjóna þessa peysu og ég tala nú ekki um húfuna. Ég keypti síðan jarðarberjatölurnar á hana í Kaupmannahöfn í sumar. En það fellur ferð til Eskilstuna með Elsu Haralds, systur Söndru svo það ýtti á mig að klára. Vonandi passar hún! (Ef smellt er með músinni ofan á myndina þá sjást tölurnar betur og einnig munstrið á húfunni)

Saumahelgi

2009-03-23T19:16:00.004Z

Jæja þá er komið að því að segja frá saumhelginni minni. Ég hafði fyrir nokkuð löngu síðan skráð mig á bútasaumsnámskeið hjá Guðrúnu Erlu (sem býr í Ameríku og rekur þar nú fyrirtæki þar sem bæði eru hönnuð mynstur og efni til bútasaums). Námskeiðin voru tvö, annað á föstudagskvöldi frá 5-9 og hitt daginn eftir frá 9 um morguninn fram til kl. að ganga fimm. Það voru margar umsóknir um námskeiðin og komust færri að en vildu.
Við Maggi ákváðum að fá bústað á leigu og njóta helgarinnar. Við lögðum af stað föstudaginn 13. mars í hinu versta veðri. Maggi keyrði mig í Gaulverjabæinn þar sem námskeiðið var endanlega haldið (það voru 73 konur það kvöld). Síðan keyrði hann í bústaðinn sem er í Ásgarðslandi við Sogið.
Þetta kvöld var mjög skemmtilegt. Þar lærði ég að sauma beint á bak og vatt. Saumaði þennan líka skemmtilega löber sem ég set mynd af inn á bloggið síðar í vor því Guðrún Erla er að gefa út bók með mynstrinu og hún kemur ekki út fyrr en í maí svo við bíðum með það. Maggi sótti mig svo á námskeiðið og komumst við klakklaust í bústaðinn en veðrið var vægast sagt hræðilegt. Hann hafði þá komið okkur vel fyrir og notið þess að eiga stund fyrir sjálfan sig með gítarnum, góðum bókum og ég tala nú ekki um heita pottinn.
Á laugardagsmorgun var veðrið þannig að M vildi endilega keyra mig á námskeiðið (ég var nú bara fegin því). Það eina sem ég vissi var að verkefnið var lúrteppi. Við fengum litla miða þar sem unnið var í þrepum. Ég fékk þrep 1 og síðan koll af kolli eftir því sem þrepin unnust en þau voru 10. Ég vann stanslaust til kl. 12, en þá fengum við kaldan hádegisver (mjög góðan) og tók ég mér bara korters pásu. Þrátt fyrir það náði ég eingöngu að klára 6 þrep fram til kl. 15.30 en þá voru nokkrar konur komnar að því að setja herlegheitin saman (ótrúlega duglegar þessar konur, brunuðu áfram með bensínfætinum eins og ég veit ekki hvað, ekki allveg mín aðferð en...). Það var spenna í loftinu þegar Guðrún Erla rúllaði teppinu út og gripu konur andann á lofti. Það er ótrúlega fallegt. Við þurftum að vera búnar að pakka saman kl. 16.30 og fékk ég ljósrit af þeim þrepum sem ég átti eftir til þess að klára heima.
Maggi sótti mig og áttum við frábært kvöld og eyddum sunnudegi í bústaðnum fram að kvöldmat og héldum þá heim á leið, sátt og úthvíld andlega.
Ég pantaði efnin í verkefnin hjá Bót á Selfossi. Það eru nú ekki mínir litir sem fyrir valinu urðu en það er bara spennandi. Ég er nú búin með öll þrepin 10 og er að setja teppið saman. Ég er að verða búin með helminginn og það er bara nokkuð snoturt. Það hefur reyndar truflað mig nokkuð litaval þeirra í Bót en við sjáum til.
Myndir koma svo í vor þegar ég má setja þær á netið.

Mér tókst það!!!

2009-03-21T17:26:00.009Z

Svona leit þetta út þegar ég byrjaði. Búin að sauma nokkrar blokkir þegar þessi mynd var tekin
Fyrst eru saumaðar blokkir og þær síðan saumaðar saman.

Á þessari mynd sést bakhluti dúksins. Mér gekk illa að fá efni sem ég var sátt við, fór meira að segja í Bót á Selfossi til þess. Ég keypti efnið í dúkinn þar fyrir um tveimur árum síðan og ætlaði að freista þess að fá eitthvað af efnunum sem ég er með í dekkinu en gekk ekki. Það endaði með því að ég fór í Virku og fékk þetta efni sem er í ferningnum sem sést á myndinni.

Og svona lítur hann út á borðstofuborðinu. Mér tókst að klára hann áður en ég fór á bútasaums námskeiðið á Selfossi um síðustu helgi. Ég á eftir að segja frá því. Það var meiriháttar skemmtilegt og ég blogga um það síðar.

Ósköp gengur þetta hægt hjá mér

2009-03-09T23:29:00.004Z

Ég er nú búin að vera að stinga epladúkinn mörg kvöld í röð og mér finnst ég ekkert komast áfram. Í dag sat ég í marga klukkutíma og er ekki hálfnuð. Á eina og hálfa hlið eftir og alla miðjuna. Þetta reynir dálítið á þolinmæði mína (sem er kannski ekki mikið til af svona venjulega) en ég sé fram á það að vera minnst 2 kvöld í viðbót. Markmiðið er að klára þetta og koma mynd á netið fyrir föstudaginn því þá ætla ég á námskeið. Fékk inni á námskeiði hjá Guðrúnu Erlu á Selfossi bæði föstudag og laugardag. Við Maggi erum búin að fá bústað í Grímsnesinu um helgina. Hlakka mikið til!
En held áfram að stinga :-(

Það er ekki leiðinlegt...

2009-02-28T20:40:00.021Z

Nú er ég orðin amma, á litla sonardóttur sem heitir Hildur Saga Gunnlaugsdóttir og fæddist 27. júní 2008. Mér þykir ótrúlega skemmtilegt að prjóna á hana og ýmislegt handa henni. Þennan jólasokk prjónaði ég handa henni í haust og saumaði út í hann myndirnar og nafnið hennar. Ég saumaði einnig tölur og fleira á sokkinn

Í fyrra vetur fór ég á þæfingarnámskeið og gerði þessa skó handa Hildi Sögu, var þá rétt búin að fá fregnir af því að hennar væri von.

Maður verður nú að vera þjóðleg þó maður búi í Svíþjóð með mömmu og pabba. Svo er þetta svo hlýtt í vagninn. Ég prjónaði peysuna úr einföldum plötulopa eftir mynstri sem Inga vinkona mín átti frá því elsti sonur hennar var á fyrsta árinu. Þetta munstur var mjög vinsælt á þeim árum þ.e. um 1981. Teppið sem er við hliðina á Hildi Sögu prjónaði ég einnig áður en hún fæddist.

Þetta sett prjónaði ég á Hildi Sögu áður en hún fæddist. Ég renndi blint í sjóinn með litinn því ég vissi ekki hvort kynið var á leiðinni. Mér finnst þessi litur ganga á bæði stelpur og stráka og svo skreytti ég hana með tölunum.

Þessa peysu prjónaði ég á hana til að koma í heim af fæðingardeildinni. Hún var nú dálítið stór á frökenina en hún var nú ekki lengi að stækka upp í hana og notaði hana fram að jólum.

Herramennirnir í uppáhaldi

2009-02-28T20:31:00.003Z

Þegar ég var í Kennó þá saumaði ég þetta rúmteppi handa Gulla. Herramennirnir voru (og reyndar eru enn) í svo miklu uppáhaldi hjá honum. Nú hangir þetta sama teppi fyrir ofan rúmið hennar Hildar Sögu sonardóttur minnar. Mér þykir ótrúlega vænt um það.

Peysan hennar Söndru

2009-02-28T20:14:00.007Z

Þessa peysu prjónaði ég fyrir nokkrum árum síðan. Söndru langaði í röndótta peysu í mörgum litum. Ég notaði ýmsa afganga í peysuna og áttu rendurnar alls ekki að vera reglulegar. En það er ótrulegt hvað ég á erfitt með að hafa hlutina óreglulega.

Einu sinni var...

2009-02-28T20:09:00.002Z

Þegar frumburðurinn var tveggja ára, fór ég á námskeið í posturlínsmálningu. Þá málaði ég þetta matarsett fyrir Gulla minn.

Epladúkurinn

2009-02-23T22:52:00.005Z

Þegar Ásta Sigrún lagði í hann til Ástralíu, gerði ég mér lítið fyrir og gerði herbergið hennar að lítilli saumastofu. Lagði undir mig tvær hillur í bókaskápnum hennar undir efnin mín og þau áhöld sem ég þarf að nota við saumaskap og skrifborðið hennar undir saumavélina góðu (sem er bara dásamleg. Einnig setti ég strauborðið upp þannig að ég hef allt við hendina sem á þarf að halda. Ásta Sigrún hefur nú hvatt mig til þess að gera þetta undanfarin 2 ár (eða frá því hún fór til Edinborgar fyrir tveimur árum) en nú er svo langt þangað til hún kemur heim að mér finnst taka því að hreiðra svolítið um mig í hornherberginu.

Jæja ég byrjaði á því að finna mynstrið af epladúknum sem ég keypti fyrir nokkrum árum. Ég var búin að sníða að mestu efnið í hann en síðan ekki söguna meir. Ég mundi að ég hafði lent í vandræðum með efnið, ekki sniðið rétt í hann. Ég var nú reyndar ekki lengi að sjá hvaða vitleysu ég hafði gert og byrjaði að raða saman og sníða það sem eftir var. Svo byrjaði saumaskapurinn og ótrúlega er þetta skemmtilegt. Nú er ég búin með dekkið (yfirborðið) og þarf nú bara að kaupa dúkavatt og bak og ljúka herlegheitunum.

Hér byrjar ballið :-)

2009-02-22T20:36:00.001Z

Ég hefði aldrei ímyndað mér að ég ætti eftir að blogga. Ég veit að börnin mín veltast um af hlátri þegar og ef þau sjá þetta.

En ég hef nú í ótrúlega langan tíma átt mér áhugamál sem eru ýmis konar hannyrðir. Í gegnum árin hef ég haft mismikinn tíma til að sinna þessu áhugamáli en nú virðist runnið upp tímabil í ævi minni þar sem ég virðist hafa aukinn tíma og hef ekki á tilfinningunni að ég sé að stela tíma frá öðrum verkefnum sem ég þarf að setja í forgang.

Ég sá hjá samstarfskonu minni og skólasystur frá því í Kvennó bloggsíðu þar sem hún setur inn þá handavinnu sem hún er að vinna ásamt ýmsu sem hún hefur gert á liðnum árum. Um daginn keypti ég saumavél af henni (og hef setið við bútasaum síðan) og þegar hún kvaddi mig á tröppum heimilis hennar sagði hún: "og svo er bara að byrja að blogga Sigga". Ég hló nú bara og lét eins og þetta væri það síðasta sem ég myndi gera en viti menn....

Ég læt þessu nú lokið að sinni og þarf að huga vel að því sem hér verður birt og hvað ekki. Ég á ótrulegt safn handavinnu sem ég vildi gjarnan eiga myndir af á svona svæði, það er í rauninni synd að ég skuli ekki hafa tekið myndir af því sem ég hef unnið um dagana.