Ný heimkynni, Drekahúsið.

Þann 1. desember 2012 fluttum við hjónin úr Lyngbergi 17 að Drekavöllum 18 í Hafnarfirði.  Við höfðum búið í Lyngberginu í tæp 25 ár, í húsi sem við hönnuðum að mestu leyti sjálf og áttum þar yndisleg ár.  Í Lyngberginu ólum við upp börnin okkar þrjú og bjuggum þeim fallegt heimili þar sem okkur leið vel við leik og störf.  Á þessari bloggsíðu minni eru margar myndir frá Lyngberginu, bæði frá húsinu sjálfu og garðinum. 

Nú eru allir flognir úr hreiðrinu og við Maggi búin að búa um okkur á nýjum stað.  Okkur líður vel á Drekavöllunum og ég held bara að börnunum finnist þau vera að koma heim þegar þau koma í heimsókn þó svo þau hafi ekki búið hér með okkur.  Hildur Saga sonardóttir okkar kallar húsið Drekahúsið og gengur heimilið okkar því undir því nafni.

Það er í rauninni stórmál að taka upp heimili eftir 25 ár og minnka verulega við sig.

Krakkarnir hjálpuðu okkur við að pakka niður og við flutningana þó svo þau væru á fullu í prófum. Jónsi svili minn kom hér og málaði með okkur ásamt Tómasi Snæ. Þorkell tengdafaðir minn hjálpaði við flutninga.  Pabbi setti upp innréttingu með mér í þvottahusið/búrið. 

Við fengum ómælda hjálp við málnigarvinnu, flutninga og svo ég tali nú ekki um andlegan stuðning frá vinum okkar Ingu, Einari, Ellu og Garðari. Það er ólýsanlega dýrmætt að eiga allt þetta fólk að.

Rósir/blóm í vasa er eitthvað sem hefur fylgt okkur alla tíð, og auðvitað eru hér rósir í vasa frá henni Þórdísi vinkonu minni.

Hér eru túlípanarnir sem ég var með á föstunni, bleik/lilla og fallegir, uppáhaldsliturinn minn þegar kemur að túlípönum.

Nú er enginn garður en þessar líka heljarinnar svalir.  Við erum með 20fermetra svalir sem eru yfirbyggðar og með parketi á gólfinu.  Þær eru í vinkil og ótrúlega gott pláss á þeim.  Nú erum við komin með nokkrar plöntur í potta og erum svona að fikra okkur áfram með að gera svalirnar klárar fyrir sumarið.

 Rósir eru náttúrulega ómissandi á svalirnar og keypti Maggi þessa búketrós í gær.

Pelagónía er góð á svalirnar þar sem hún fælir burtu geitunga ;-)  Ég og geitungar eigum ekki samleið!

Hér eru svo húsgögnin okkar sem við vorum líka með í Lyngberginu, hjólaborðið hefur reyndar öðlast nýtt hlutverk hér á svölunum og gott að hafa það fyrir kaffibollann á morgnana.

Fór í vikunni og keypti þessar mottur til að fá smá lit í umhverfið sem við erum að reyna að skapa hér.

Man ekki hvað þetta blóm heitir en knúpparnir á því verða antíkbleikir þegar sólin nær að lita þá í vor.

Þarna er svo mynd af litlunni minni í Eskilstuna sem verður bráðum fimm ára og stóra systir.  Hún er búin að koma tvisvar til landsins síðan við fluttum og kunni bara vel við sig í Drekahúsinu.

Látum þessum pistli lokið að sinni, takk fyrir innlitið.

Loksins, loksins, langþráð sumarfrí.

Það er einhvern veginn þannig að um leið og ég kemst í sumarfrí þá er fyrsta hugsunin að finna mér eitthvað á prjónana.  Í þetta skiptið er það fallegt bómullargarn úr Storkinum í peysu á hana Evu mína á Írlandi sem verður tveggja ára í júlí.

Eins og veðrið var í dag er yndislegt að sitja úti í sólinni og njóta.  Njóta veðurblíðunnar með eitthvað fallegt á prjónunum, kaffi við höndina og ekki verra að hafa eitthvað gott með kaffinu.

Ég læt þessa fallegu mynd fylgja með en þetta eru blómin sem ég fékk á mæðradaginn frá börnunum mínum.  Svona stóðu rósirnar í tvær vikur, yndislegar.

Takk fyrir innlitið og sjáumst fljótt aftur.

Þá er páskalöberinn tilbúinn rétt korter fyrir páska ;-)

Ég lofaði því víst í síðasta pósti að setja inn myndir þegar ég væri komin af stað með páskalöberinn og hef  reyndar ekki staðið við það en nú er hann tilbúinn og hér á eftir koma myndir af herlegheitunum.

Þessi er tekin þegar ég var búin að sauma bæði framhlið og bak og setja vattið á milli og var að máta hann á borðstofuborðið.  Ég sá það fyrir mér hvernig ég vildi hafa hann !

Hér er hann á strauborðinu og ég búin að næla allt vel saman og búin að hálfsauma briddinguna á.

Og svona lítur hann út.  Búin að ljúka við briddinguna, applikera eggin á hann (þau sýnast reyndar hvít á öðrum endanum en þau eru grændröfnótt og eru öll úr sama efninu.

Hér sjást eggin betur, þau eru þrjú þarna og svo tvö á hinum endanum

Fallegir kertastjakar komnir á sinn stað í lit sem fellur vel að grænu litunum í löbernum.

Og þarna er hann kominn, korter í páska.  Ég valdi þessa liti svo ég gæti notað hann eitthvað fram í vorið.

Takk fyrir innlitið og gleðilega páska.

Ýmislegt í gangi ;-)

Ég fór til Eskilstuna í febrúar.  Ungu hjónin skruppu til Parísar og við ömmgurnar vorum saman á meðan. Ótrúlegur tími sem við áttum saman og skemmtum okkur konunglega.  Gerðum nákvæmlega það sem okkur langaði til, þegar okkur langaði til !  Við fórum í strætó, í dansinn, leikhús, dýragarðinn, bæinn, lásum, knúsuðumst, bökuðum og fleira og fleira

Ég er búin að vera að ljúka nokkrum verkefnum svona hægt og bítandi og eitt af þeim er þessi taska sem ég byrjaði á í haust.  Tók hana upp aftur þegar ég kom heim og er um það bil að klára hana.

Ég er nú ekkert voðalega klár í því að applikera í vélinni en stakk nú bara nokkuð meira en ég ætlaði í upphafi, ágætt verkefni til að æfa sig.  Það er nú skemmtilegt að hafa svona góða aðstöðu og geta svo hlustað á útvarpið eða fylgst með einhverjum þáttum á tölvunni á meðan maður er að vinna.

Ég var mikið að hugsa um hvernig ég ætti að ganga frá henni og endaði með ljósu fóðri og rauðri bindingu.  

Ég á eftir að festa á hana handföngin/höldurnar, er enn að hugsa hvernig þær eigi að vera, klára það á morgun vonandi. Húsin eru ekkert skökk, það er bara svo erfitt að láta hana standa vel.

Ég er líka að prjóna lopapeysu á Magga minn og gengur frekar hægt en þetta er allt að koma vonandi klára ég hana fyrir páska.

Fór svo í Virku í dag og keypti mér nokkur efni í sætan páskalöber, hendi myndum af honum inn þegar ég er komin af stað með hann.

Nóg í bili.  Takk fyrir innlitið ;-)

Bútasaumur

Ég gerði svona snyrtibuddur/pennaveski fyrir jólin og gaf í jólagjafir.  Ég reyndi að velja efnin og litina eftir þeim sem áttu að fá þær t.d. fékk Sæunn bróðurdóttir mín þessa grænu og fyllti ég hana af allskonar snyrtidóti og svo setti ég ég "bókaorm" sem er bókamertki með þessu þar sem hún er svoddan bókaormur;-)

Á myndinni sést hvernig þetta er gert, fyrst saumar maður ræmur beint á bak.

Þessa bláu fékk hún Sigrún Ingibjörg bróðurdóttir mín.  Ég fyllti þessa líka með ýmsum snyrtivörum og bókamerki, því hún er líka mikið fyrir lestur.

Hér er ég búin að sauma budduna saman en er að setja í hana rennilás og snýr rangan út.

Þessa hér fyrir neðan gerði ég reyndar fyrst þannig að hún er prufan!  Hana ætla ég að eiga og fyllti hana af ýmiskonar pennum og nota hana sem pennaveski. Á þessari mynd er buddan/veskið fullgert.

Þessu teppi byrjaði ég á fyrir löngu síðan en það varð ekkert úr því að ég kláraði það.  Nú er Hildur mín Saga að verða fjögurra ára og fannst mér það vera allt of lítið fyrir hana.  Ég tók mig til og stækkaði það um eina mynsturrönd og bætti húsinu þar inn. Teppið heitir að mig minnir Dýrin í sveitinni.

Þetta er lúrteppi fyrir hana, mátulega stórt til að setja yfir sig í sögustund með pabba og mömmu.

Set eitthvað fleira hér inn eftir því sem tími leyfir.  Takk fyrir innlitið. 



Jól í Lyngbergi 2011 og heklaðar jólabjöllur.

Ég hef nú gert ýmislegt skemmtilegt frá því síðasta blogg birtist á þessari síðu en ég held ég sé ekkert að setja það hér inn núna, geri það kannski seinna.  En fyrir jólin þá heklaði ég svona jólabjöllur utan um seríur handa litlu fjölskyldunni í Eskilstuna, Ástu Sigrúnu og Kalla og Söru.  Þegar ég hafði lokið þessum þremur þá langaði mig að eiga svona líka svo ég gerði eina fyrir Lyngbergið.

Eins og þið vitið þá er þessi bakki algjört uppáhald hjá mér.  Hann er klæddur í nýjan búning eftir árstíðum og svona leit hann út núna um jólin.

Það snjóaði og snjóaði og eina nóttina þegar ég kom fram var birtan svo ótrúlega falleg og glugginn í eldhúsinu skartaði sínu fegursta í þessari birtu.  Ég tók myndirnar hér fyrir neðan án flass og finnst þær ennþá dulúðlegri fyrir bragðið.

Kannski ég komist í bloggstuð núna, hver veit?

Leti eða bara nóg að gera!

Já leti eða er bara nóg að gera hjá mér?  Síðustu blogg hafa byrjað eitthvað á þá leið að nú sé langt síðan síðast eða langt frá því síðast blogg var sett hér inn.  Ég hallast helst að því að ég hafi bara nóg að gera.  Í haust hef ég nú aðallega verið að prjóna eitt og annað sem ég set myndir af hér fyrir neðan.  Jólin komu og fóru en ég held nú samt að það skemmtilegasta sem gerðist í haust var að þær komu til Íslands mæðgurnar frá Eskilstuna og ég naut þess að vera amma í nokkra daga.  Hildur Saga mín er orðin svo stór og dugleg og við áttum yndislegar stundir saman ömmgurnar.

Ég hef verið að föndra eitt og annað og eru þessi prjónamerki dæmi um það.  Ég hef reyndar verið að selja þau og renna þau út eins og heitar lummur.  Skemmtilegt að gera eitthvað allt annað en ég er vön.

Ástu Sigrúnu mína langaði í trefil/sjal og valdi litina í það í haust.  Við fundum síðan uppskrift af gömlu langsjali með skemmtilegu skeljamynstri sem ég prjónaði fyrir hana.  Það er úr einbandi og strekktum við það mátulega mikið þ.e. hún vildi hafa það strekkt en ekki svo mikið að það væri sjal, vildi hafa það sem trefil.

Þegar við Ásta Sigrún keyptum í sjalið keypti ég þennan plötulopa (sem er svo skemmtilega sprengdur í litnum) og tvo liti af einbandi til að prjóna með honum.  Nú er ég að ljúka við peysu úr þessu (á Hildi Sögu).

Hér fyrir neðan er svo mynd af peysunni en ég er bara búin að prjóna hana á eftir að ganga frá endum og sauma tölurnar á.  Set aðra mynd af henni þegar ég er búin að ganga frá og prjóna húfuna (sem er hálfprjónuð). Ég prjóna hana úr einföldum plötulopanum en skipti einbandinu út til skiptis rauðu og appelsínugulu.  Þá myndast þessar skemmtilegu rendur.

Mér finnst alltaf svo gaman að taka myndir hér heima og fylgir hér ein með.

Hér fyrir neðan eru myndir af bakstri og kókóskúlugerð en eins og ég hef áður sagt frá þá förum við Maggi oft í bústað fyrir jólin og gerum eitthvað skemmtilegt fyrir jólin.  Í þetta skiptið fórum við tvær ferðir, önnur var jólakortaferð en í hinni bjuggum við til kókóskúlurnar sem tilheyra nú eiginlega konfektgerð heimilisins.

Og á meðan ég gerði þær, hnoðaði Maggi í hnetusmjörskökur en þær eru látnar bíða úti við (kjöraðstæður -4°) og síðan bakaðar.  Eitt af því besta sem við gerum fyrir jólin.

Við gerum oft eitthvað nýstárlegt þegar við förum í bústað og um daginn steiktum við ástarpunga.  Við höfum oft steikt kleinur fyrir jól en aldrei ástarpunga og voru þeir bæði vel heppnaðir og hættulega góðir;-)

Og að lokum er hér mynd af peysu sem ég var að prjóna úr léttlopa á mig.  Það er svo merkilegt hvað ég er oft ósátt við peysur sem ég prjóna á mig sjálfa.  

Þá held ég að nóg sé komið í þetta blogg.  Ég er ekkert að telja upp öll jólaverkin en körfurnar voru á sínum stað og ýmislegt skemmtilegt rataði í þær sem ég hef ekki sett áður t.d. heimagert konfekt í litlum dósum og enskar skonsur o.fl.  Bless í bili og ég vona að það líði ekki eins langur tími fram að næsta bloggi.